A hơpiâp on ki hơtôu dêi rơpŏng, a pơlê Mrông Yố 1, cheăm Ia Ka, tơring Čư̆ Păh, kong pơlê Gia Lai, pôa Rơ Châm Byat xuân ối kơmêi tối ‘na tơdroăng pêi pro ôh tá tro dêi tơná. Hơnăm 2001, pôa tro mâu khu ‘mêi trâm mâ tơpui tơno ƀă hlối pơlông djâ tiô khu ki tơtrâ vâ pro tơ’nhiê tơnêi têa “Tin Lành Đê Ga”. Drêng mê nah, pôa ôh ti ‘nâi kố cho khu tơrŭm ki ôh tá tro, hmuâ pá rŏng tơdroăng loi tĭng - tiô khôp vâ pro tơ’nhiê tơnêi têa. Tung pơla pôa xuân ối ôh ti ‘nâi ti lâi mê vâi hmâ tơpui pơlông mâu rơkong tơpui ki lĕm tro vâ hêak, tâng tiô vâi pôa kô ai hngêi hôp krê vâ khôp, mơngế Jarai kô ai tơnêi têa krê dêi tơná, châ pôk pro kăn pơkuâ kuăn pơlê, pơkuâ tơnêi tơníu kân rơdâ:

“Gá tối kong têa ê vâi kô veăng tơpui ƀă tŏng gum mê pôi tá xâu, athế rak tơdroăng khôp Đê Ga dêi tơná. Drêng mê, gá pơcháu ăm pin 4 to pơlê, drêng troh rôh ki hiăng hlê plĕng mê cho tơdroăng ôh tá tro. Pin tơtrâ Tơnêi têa, tơtrâ khu kăn pơkuâ, tơtrâ kăn ƀô̆ ƀă tơtrâ hên mâu khu ki ê cho pin ôh tá tro. Vâi hnê pin hên rôh mê pin ôh tá tơmâng”.

Tâng pôa Rơ Châm Byat rĕng hlê tơdroăng pro ôh tá tro, mê ƀă pôa Siu Un (59 hơnăm), ối a thôn Tân Điệp 1, cheăm Ia Ake, tơring Phú Thiện, tơdroăng ki trâm hrá tâ. Cho môi tung mâu ngế tơrŭm xiâm dêi khu tơrŭm ‘Tin Lành Đê Ga” a Gia Lai, pôa Siu Un hiăng tro kroăng phâk 16 hơnăm xua mâu tơdroăng pêi pro phá tơ-ê ƀă ki pơxúa dêi tơnêi têa.

Apoăng mâu hơnăm 2000, pôa Siu Un cho ngế ki hiăng châ chêh inâi tung mâu ngế xiâm dêi Tin Lành Đê Ga a kong pơlê Gia Lai. Siu Un pơkuâ djâ FULRO râ kơpong, cho ngế ki xiâm tung rôh ki tríu tơkêk a Ayun Pa a hơnăm 2001 vâ tơtrâ “mơngế Xuăn xo tơnêi dêi kuăn pơlê hdroâng kuăn ngo”, pâ thế mơjiâng “Tơnêi têa Đê Ga tơniăn krê”, djâ dêi rơpó troh a tíu pêi cheăng cheăm pro pá ăm khu kăn pơkuâ. Pôa Siu Un tro rup a khế 2/2001, klêi mê pơkâ thế ối tung hngêi kroăng phâk cho 16 hơnăm xua mâu tơdroăng xôi “rup mơngế ôh tá tro luât, pro ôh tá tơniăn tung pơlê pơla ƀă pro tơ’nhiê tơdroăng gâk kring”. Pôa Siu Un chôu vế:

“Rêm hâi môi ngế pôa tơkôm, tơkôm kô ai ngế ki tŏng xo dêi tơná. Xua pôa cho ngế ki râng ko tá môi tơring mê khu tơrŭm athế chôu vế troh pôa, athế tŏng xo pôa, tơdroăng ki tơná ối u lâi mê vâi kô ‘nâi. Klêi mê, a khế 10/2001 pơxiâm tơleăng. Ngin ối a tíu ki kroăng phâk, xuân ai tơdroăng ki tơkôm, xuân ai tơdroăng ki tơngah ƀă hên ki ê. Troh hơnăm má 5 mê á hiăng tâi tơdroăng ki tơngah a mâu ngế ki kô lăm tŏng xo á”.

Mâu hơnăm khế ối tung hngêi phâk ôh ti xê cho tơdroăng ki pơxâu phâk ăm kơ pôa Siu Un mê ối cho tơdroăng ki châi heăng ƀă rơpŏng hngêi pôa. A pơlê, kơdrâi pôa cho jâ Ksor H’Loi, môi ngế roăng rak kuăn tơxĭn tung tơdroăng ki trâm hên pá puât. Tơdroăng ki pro ăm jâ Ksor H’Loi châi heăng tâ tá cho tơdroăng ki hêak dêi khu tơrŭm Tin lành Đê Ga. Ôh ti ai hí môi ngế kơbố tung kơxô̆ ki mê vâi troh pôu Siu Un lơ gum rơpŏng pôa môi tiah rơkong ki tơpui tối lĕm tro ki hdrối nah. Chôu vế mâu hâi khế ki châi heăng mê, jâ Ksor H’Loi ƀriê lo têa mâ:

“Kot mâ kuăn kơnốu châ 2 khế mê kơnốu á lăm kroăng phâk, lôi á ối a hngêi. Kuăn ‘nĕng dế ối tơxĭn, kơnốu lăm kroăng phâk ‘nâi păn roăng kuăn môi tiah lâi. Kuăn kơdrâi kân sap ing hriâm lâm 6 troh lâm 9 bu ai 1 plâ hmân ếo xo. Gá khéa! Tơnêi têa ƀă mâu kăn ƀô̆ mơhnhôk á pôi tá tôu tuăn athế rak ngăn kuăn tơná. Nôkố kơnốu á hiăng vêh ƀă rơpŏng. Ngế kuăn kơnốu ki kân tối: Pâ ôi pâ hiăng xôi ƀă Tơnêi têa ƀă khu kăn pơkuâ mê nôkố pâ athế pêi mâu tơdroăng ki lĕm tro tê”.

Tung mâu hơnăm 2001, 2004, 2008 a Tây Nguyên tối krê ƀă kong pơlê Gia Lai tối tơdjuôm, xua tơdroăng ki pơlông djâ, hnê mơhno, tŏng gum dêi mâu khu ‘mêi sap ing kong têa ê khĕn cho “Hội thánh Tin Lành Đê Ga” hiăng mơhnhôk kuăn pơlê pro chiâng ai mâu rôh tơxiăn tơpâm, tríu tơkêk pro kuăn pơlê hêng hôu khât. Tơdroăng pro dêi khu tơrŭm kố cho tơpui tối hêak ôh tá tro ƀă troăng hơlâ tŏng gum dêi Tơnêi têa, pro tơklâ tơdroăng tơrŭm, tơpui tối mâu tơdroăng ki pro hêng hôu. Tơdroăng pêi dêi vâi hiăng ‘măn chôu mâu tơdroăng ki châi heăng ăm lối rơpâu rơpŏng, mâu ngế tung khu ki mê hiăng trâm mâu tơdroăng ki ôh tá tơniăn khât ăm mâu tơdroăng pro xôi dêi tơná. Ƀă ki khât, vâi bu cho ngế ki ối pá rŏng khu tơrŭm kố xo.