https://vov4.vov.vn/xodang/todroang-neo-ai-pole-pola-thoi-su-xa-hoi/bai-1-toang-ton-nahmau-nge-prok-troang-oh-ta-tro-477975.vov4

Tơdroăng hơ’muăn ‘na môi ngế ‘’Kăn pơkuâ” hmếo pơ pôk tơná cho Khu FULRO ki vâi ô eăng tung hdroâng kuăn ngo a Tây Nguyên cho pôa Ybome (vâi hmâ krếo cho Ja Na - 68 tuổi), ối a pơlê Ring Rai, cheăm Hà Bầu, tơring Đăk Đoa, kong pơlê Gia Lai. Khế 2/2001, ing tơdroăng mơhnhôk djâ dêi Ksor Kơk - Ngế pơkuâ khu FULRO ki tăng hmuâ ối a kong têa Mih, hên ngế kuăn ngo ki tro vâi mơhnhôk djâ hiăng veăng lăm tríu tơkêk pro ôh tá tơniăn.

Kơ’nâi ai tơdroăng mê, Ja Na tro rup phâk 12 hơnăm xua ai xôi “Pro tơ’nhiê luât pơkâ tơrŭm môi tuăn hdroâng mơngế, hdroâng kuăn ngo”. Tung pơla ối phâk, pôa Ybome ‘nâi dêi tơná xôi, klêi hiăng tâi hơnăm phâk, lo ing hngêi phâk hiăng kơhnâ pêi cheăng mơnhông tơdroăng rêh ối nếo.

“Dế ối pro mâu tơdroăng tơxul tơxal, tríu tơkêk, nôkố tơmiât troh tơdroăng ki pro hdrối nah hmếo pơ chiâng lo têa mâ. A pro tơdroăng mê mơ’nui vâi krâ nhŏng o tung pơlê pôu râng xêh tơdroăng mê, athế lăm phâk. Nôkố vêh troh a pơlê a tối nhên ăm kuăn pơlê hlê tơdroăng ki tơrŭm môi tuăn dêi rơpó ti lâi, ki kal thế ‘nâi tơrŭm môi tuăn dêi rơpó, mê nếo kâi ƀlêi tŭm tơdroăng”.

‘Na pôa Siu Un, 59 hơnăm, ối a thôn Tân Điệp 1, cheăm Ia Ake, tơring Phú Thiện, ngế ki hiăng tơkâ luâ 16 hơnăm ối tung hngêi phâk, ối a ngâ cho môi tơdroăng ki vâ xo nếo tơdroăng tuăn loi. Khế 6/2022, pôa vêh rêh ối pêi cheăng tung hngêi khôp tung khu khôp Tin Lành a thôn, cho Tin Lành ki hnê ‘na tơdroăng ing khôp Pâ Xeăng - môi tơdroăng khôp ki luât ăm phêp. Pôa Siu Un nôkố hiăng ôh tá xâu, ôh tá kơxiâp kơmê, ôh tá tro khu ‘mêi pa kong pơlông djâ. Pôa hmâ hơ’muăn tối tơdroăng ki tơná tro hlôp vâi pơlông djâ ƀă hiăng vêh ƀă tuăn loi dêi tơná, gum kuăn pơlê tung pơlê thế ‘nâi tơdroăng ki lâi tro ki lâi ôh.  

 “Athế vêh ƀă tuăn loi tê, vêh ƀă tơdroăng loi tĭng tiô khôp ki tro. Drêng vêh, Đảng, Tơnêi têa, mâu kăn kô ôh tá pơrah kơ á, tơpui ngăn lĕm bă á. Á xuân vâ kuăn pơlê, mâu tíu môi tiah a Dak Lak, Gia Lai ƀă tíu ki ê... mâu ngế ki lâi dế kreăng ‘na Tin Lành Đê Ga thế rĕng vêh lĕm ƀă tuăn loi, vêh ƀă tơdroăng loi tĭng tiô khôp ki tro tiô luât ki Đảng ƀă Tơnêi têa ăm phêp”.

Vâ troăng vêh ƀă kuăn pơlê, ƀă tuăn loi tơdrăng tơ’nôm ƀă po rơdâ, mâu hơnăm hdrối nah, kong pơlê Gia Lai hiăng tơbleăng túa pêi pro “Vêh ƀă tuăn loi - rak hơniâp ăm thôn pơlê, ƀă tơdroăng veăng ‘no dêi 4 khu: Đảng viên, mâu ngế kuăn pơlê pâ nhoăm, mâu ƀok yah mâu ngế pơkuâ hnê ngăn tơdroăng khôp ƀă mâu ngế ki tro hyông troăng tro hlôp tiô Fulro.

Cho ngế pơkuâ Khu Tin Lành Việt Nam (Peăng Hdroh), xuân cho ngế pơkuâ cheăng ‘na Măt trâ̆n thôn Sô Ma Lơng, cheăm Chroh Pơnan, tơring Phú Thiện, kong pơlê Gia Lai, pôa Ksor Đuing ăm ‘nâi, a ƀă mâu kăn mơhnhôk hên ngế pôi tá tiu Tin Lành Đê Ga vâ khôp tro tiô luât.

 “Mâu kăn cheăm, tơring, kong pơlê đi đo tơmâng khât troh ngin, pro tơ’lêi hlâu vâ ngin khôp tiah hmâ. Xuân krếo mâu nhŏng o ki tro hyông troăng hlôp khu ‘mêi pơlông thế rĕng prếo vêh. Ki apoăng ngin tơdah 13 rơpŏng thế, la kơ’nâi mê chôa i iâ ƀă troh nôkố lối 300 ngế. Mâu ngé ki hyông troăng mê ngin tơkŭm hnê hlối tơrŭm ƀă pôa Siu Un - Ngế prôk tơrêm rơpŏng hngêi mơhnhôk, hnê tối ăm kuăn pơlê loi prôk tiô troăng hơlâ dêi Đảng, Tơnêi têa”.

Tiô pôa Rah Lan Chung, Phŏ Kăn hnê ngăn Đảng kong pơlê, Kăn hnê ngăn Vi ƀan kuăn pơlê kong pơlê Gia Lai, ƀă mâu tơdroăng hnê tro khâp, tơdroăng “vêh tiô tuăn loi, rak hơniâp lĕm dêi thôn pơlê” a pơlê cheăm thế hmâ tơpui lĕm ƀă mâu ngế ki tro hyông troăng ki vâ prếo vêh rêh ối, mơ-eăm pêi cheăng mơnhông dêi rơpŏng hngêi ƀă veăng ‘no hnoăng mơnhông pơlê pơla.

“Pơla hdrối kố nah hiăng mơhnhôk ivá rơdêi dêi tâi tâng khu cheăng kal kí rơtế veăng tơleăng mơnhên mâu tơdroăng pá dêi mâu ngế ki hdrối nah veăng tiô Fulro drêng vêh rêh ối ƀă nhŏng o tung pơlê, hnê ‘mâi rơnêu, hnê ăm hlê vâ vâi pôi tá vêh pêi pro xếo mâu tơdroăng ki ôh tá tro pro tơ’nhiê mâu kăn tơnêi têa. Tung mâu tơring dêi kong pơlê dế pêi túa “Vêh ƀă tuăn loi- rak hơniâp lĕm ăm thôn pơlê” ngin khĕn kơdeăn khât ‘na pêi pro tơƀrê, ai pơxúa. Túa pêi pro mê hiăng châ Khu xiâm kŏng an tối ƀă mơnhên kong pơlê Gia Lai cho môi tung mâu tíu pơtối pêi ƀă pro rơdâ túa mê, ôh tá xê to dêi Gia Lai mê ối tá lâp mâu kong pơlê kơpong Tây Nguyên.