Kơxo lơ 19/2, a pơlê kong kơdrâm Pleiku, kong pơlê Gia Lai, Ƀinh đoân 15 tơkŭm po kân krip Leh tơbâ 40 hơnăm Hâi mơjiâng Ƀinh đoân. Tung 40 hơnăm hiăng hluâ, Ƀinh đoân 15 pêi pro rơtế hnoăng cheăng kâ ƀă gâk kring tơnêi têa. Nôkố tíu cheăng pơkuâ lối 44.295 ha kơxu ƀă vâ chê 400 ha báu, prá alâi, rơtế 6 hngêi kơmăi pro chá kơxu ƀă pro châ 55.000 tâ̆n/hơnăm. Ƀinh đoân hiăng veăng tơlo lối 2.800 rơtal liăn tung liăn ngân tơnêi têa.

Rơtế ƀă mơnhông cheăng kâ, Ƀinh đoân 15 đi đo tơtrŏng tơdroăng mơhnhôk kuăn pơlê, gum kuăn pơlê xăm kơklêa kơdroh kơtiê, mơjiâng thôn pơlê nếo. Tíu cheăng hiăng kum mơjiâng ƀă rơnêu lối 1.500 km troăng klông, 400 km troăng on tơhrik, rơtế hên hngêi hôp pơlê pơla, hngêi pơkeăng, hngêi trung.