Ki kal cho tơdroăng tung leh tơbâ 50 hơnăm Hâi tơleăng lĕm peăng Hdroh tơnêi têa, tơnêi têa tơrŭm chiâng môi (30/4/1975 – 30/4/2025), vâ mơnhên râ, ki kơnía troăng pêi cheăng ton xŏn dêi Ƀlêi trâng Tây Nguyên tung roh tơplâ ƀâ tŏng gum tơnêi têa. A roh tơpui tơno, mâu kăn pơkuâ lêng, ngế cheăng khoa hok ƀă teăng mâ mâu kơ koan, tíu cheăng ối tung Ƀinh đoân Tây Nguyên (ki ahdrối nah cho Kuân đoân 3) hiăng mơnhên tối mâu tơdroăng ki pro chiâng ƀlêi trâng roh mê nah kố.

Ing hnê mơhno rơkê dêi Đảng, ngê̆ thuât pơkuâ troăng tơplâ ton xŏn, troh tơdroăng tơmiât pêi rơkê tung tơdroăng tơplâ dêi Khu lêng kuăn pơlê Việt Nam. Roh trâm mâ tơpui tơno ôh tá xê to vâ vêh tơbâ mâu ƀlêi trâng kân mê ối xo vế mâu ƀai hriâm ki kơnâ ăm roh mơjiâng ƀă gâk kring Tơnêi têa hâi kố; gum tơplâ mơdât mâu tơdroăng ki tăng ‘nhê tơnêi têa; pro krá tơniăn hiâm mơno loi tơngah tung la ngiâ tơnêi têa.

Tơdrêng amê, kố xuân cho roh vâ hnê hriâm khôi túa kăch măng, mơnhông hiâm mơno hâk tơngăm hdroâng mơngế ƀă hiâm mơno pâ nhuô̆m tơnêi têa, ki rơhêng vâ tối cho ƀă rơxông ối nếo.