VOV4.Xơ Đăng - Kơxo lơ 7/2, hdrối vâ pơxiâm pêi cheăng hâi apoăng klêi pơtê Têt Lo hơnăm nếo Nhâm Dần, pôa Phạm Bình Minh, Ngế pro xiâm phŏ hnê ngăn  tơnêi têa rơtế ƀă mâu mâu Ngế pro xiâm phŏ hnê ngăn tơnêi têa cho: pôa Lê Minh Khái, pôa Vũ Đức Đam, pôa Lê Văn Thành hiăng trâm mâ mâu kăn ƀô̆, mâu kăn pơkuâ Ƀơrô Chin phuh. Tơpui a rôh trâm mâ, drêng troh apoăng lo hơnăm nếo, teăng mâ kăn xiâm hnê mơhno Chin phuh, pôa Phạm Bình Minh, Ngế pro xiâm phŏ hnê ngăn tơnêi têa khĕn kơdeăn mâu hnoăng cheăng hiăng pêi tơ-ƀrê, veăng ‘no hnoăng pêi dêi Ƀơrô Chin phuh ƀă mâu tơdroăng cheăng pêi dêi Chin phuh, Ngế pro xiâm hnê ngăn Chin phuh; rơkâu tâi tâng kăn ƀô̆, kŏng chưc, viên chưk, mơngế pêi cheăng hơnăm nếo ai hên ivá mo xêi, hơniâp ro ƀă pơtối pê tơ-ƀrê hên tâ nếo mâu tơdroăng cheăng.

Hơnăm 2022 cho hơnăm má péa tơbleăng pêi tiô pơkâ mơnhông cheăng kâ rêh ối hơnăm 2021-2025 ƀă Tơdroăng ‘mâi mơnhông ƀă mơnhông tơ-ƀrê cheăng kâ ‘na mâu tơdroăng cheăng pêi, xua mê Ngế pro xiâm hnê ngăn tơnêi têa púi vâ mâu tíu pêi cheăng ƀă tơrêm ngế kăn ƀô̆, mâu ngế pơkuâ mâu tíu pêi cheăng, mâu ngế pêi cheăng a rêm kơ koan ing hâi apoăng hơnăm, mâu ngế pêi cheăng dei Ƀơrô Chin phuh pơxiâm pêi cheăng kơtăng ing hâi apoăng hơnăm nếo.

Gương tơplôu ƀă tơbleăng