Tung tơdroăng ki ƀriê tung hiâm mơno ‘na mâu hâi apoăng tơleăng kong pơlê Dak Lak, pôa Y Per Niê, a bêng Đạt Hiếu, pơlê kong krâm Ƀuôn Hồ (hdrối nah, cho pêi cheăng a tíu pêt kơphế Rossi dêi khu pơkuâ ki ton) ăm ‘nâi: Klêi kơ’nâi tơleăng, tíu ki pêt kơphế Rossi kố hdrối nah cho ối tung tơdroăng pơkuâ ngăn dêi ngế krê dêi khu pơkuâ chal ki ton hiăng châ Tơnêi têa pơcháu ăm khu cheăng tơdjuôm pơkuâ ngăn. Mâu khu kăn pơkuâ ki nếo pơxiâm tơdroăng ki tơrŭm pêt, mơjiâng pơlê cheăm.

“Klêi tơleăng tíu pêt kơphế kố vâi pơhlêh ngế ki pơkuâ, mơjiâng nông trường, tơmiât pêi cheăng kâ, mơhnhôk kuăn pơlê pro hno têa, cho a hno têa ƀuôn Trinh sap ing tíu pêt kơphế Rossi troh tá vâ tôh kơphế, tôh klâng báu kuăn pơlê vâi phiu ro khât mê vâi kơhnâ veăng pro hno têa. Vâi chiâ hno têa ƀă ivá hâk tơngăm dêi rôh nếo châ tơleăng. Tối tơdjuôm cho kŏng nhân ƀă kuăn pơlê bô bố xuân phiu ro xua ing nôkố hluăn ing tơdroăng ki tro khu xâ pro pá”.

Klêi kơ’nâi 50 hơnăm Ƀlêi trâng Ƀuôn Ma Thuột ƀă tơleăng kong pơlê Dak Lak, hiâm mơno kuăn pơlê pêng păm tơdroăng hâk tơngăm ƀă ƀriê. Mâu hơnăm khế ki pá puât hiăng châ pơhlêh ƀă mâu tơdroăng ki hâk tơngăm, po troăng ăm môi chal ki mơnhông cheăng kâ rêh ối pơlê pơla hiăng veăng gum kal khât tung pro chiâng kơxô̆ liăn pêi lo tơniăn, mơdêk ki kơnía rế tâk ăm kế tơmeăm pêi lo ing chiâk deăng ƀă tối rơdêi tíu ối dêi kơphế Việt Nam a kong têa lâp plâi tơnêi. Pâ H’Loan a bêng Thắng Lợi, pơlê kong kơdrâm Ƀuôn Ma Thuột tối tơdroăng ki hâk tơngăm:

“Malối cho hơnăm kố Tơbâ 50 hơnăm Ƀlêi trâng Ƀuôn Ma Thuột, ƀă xuân cho po Leh tơbleăng kơphế châ tơkŭm po kân má môi sap nah troh nôkố. Hnoăng cheăng dêi á ƀă mâu ngê̆ nhân ối tung pơlê cho mâu ngế ki tơbleăng tối ‘na ki lĕm dêi khôi túa lĕm tro dêi mơngế Rơđế. Mê cho mâu tơmeăm, ếo, pơtâk tê̆n, mâu kơđôn proâ chal krâ môi tiah: tơdŭt, đing năm, t’rưng ƀă hên ki ê. Malối hơnăm kố tơbâ 50 hơnăm tơleăng kong pơlê Dak Lak, á hlo tơdroăng rêh ối dêi kuăn pơlê hiăng pơhlêh hên, mơnhông tơtêk. Kuăn pơlê hiăng pơhlêh túa tơmiât pêi cheăng kâ; malối cho ing hơnăm nah troh nôkố, kơphế tê châ yă kơnâ. Mê cho tơdroăng ki ro kân ăm mâu ngế ki pêt kơphế”.

Leh po mơđah tơbleăng Kơphế Buôn Ma Thuột rôh má 9 hơnăm 2025, ai hên tơdroăng pêi pro ô eăng mâu ngế ki pêt, uâ pơliê ƀă tê mơdró kơphế; tơbleăng ki ai hlâu ‘na ôm hyô, pơkâ mơdêk ‘no liăn cheăng tung kơvâ kơphế ƀă mâu tơmeăm pêi lo ing chiâk deăng; tơbleăng, mơđah khôi túa lĕm tro khôi hmâ ki lĕm tro dêi kuăn pơlê hdroâng kuăn ngo, malối cho tơdroăng ki tŏn chêng tôu koăng Tây Nguyên – Tơdroăng ki hnê pơtó ƀă Tơmeăm ki kơnía git dêi kuăn mơngế. Jâ H’Bích Ƀuôn Yă, a Ƀuôn Brê, cheăm Hòa Phú, pơlê kong kơdrâm Buôn Ma Thuột tối:

“Po mơđah tơbleăng kố cho tơdroăng ki ro kân ăm tâi tâng kuăn pơlê a kong pơlê pin. Mâu kuăn pơlê ki pêi chiâk pêt kơphế xuân ro xua kơphế tê châ yă kơnâ kô ai tŭm liăn ngân vâ roê mâu tơmeăm xúa tung tơdroăng cheăng. Á xuân hâk tơngăm xua kố cho rôh ki tơ’lêi hlâu vâ kơphế dêi pin châ lo troh a kong têa ê. Hvái ngăn 50 hơnăm hdrối, tơdroăng rêh ối cheăng kâ kuăn pơlê hiăng mơnhông khât, malối cho péa hơnăm achê kố, kơphế to kơnâ, kuăn pơlê pin hiăng châ mơdrếo tâi chĕn mê vâi ro khât’’.

Ƀă tơdroăng ki tơbleăng “Buôn Ma Thuột – tíu troh dêi kơphế lâp plâi tơnêi’’, po tơbleăng kơphế Buôn Ma Thuột rôh má 9 ô eăng mâu ngế ki kơhnâ rơkê tung kơvâ túa lĕm tro, ôm hyô, hlê plĕng trâu hơngế ‘na kơphế ƀă túa lĕm tro Tây Nguyên. Ngoh Y Miu Niê, a cheăm Ea Drông, pơlê kong krâm Ƀuôn Hồ, cho môi tung mâu ngế ki teăng mâ tung um tơvi ăm Po leh tơbleăng kố ăm ‘nâi, rôh kố dế mơ-eăm vâ pơtroh mâu tơdroăng ki kal “Buôn Ma Thuột – tíu troh dêi kơphế lâp plâi tơnêi’’:

“Á hlo po tơbleăng kơphế kố gá pơxúa khât, ro, kuăn pơlê ki pêi chiâk xuân hâk vâ koh tơdah po mơdĭng. Ing mê, pro ivá ăm kuăn pơlê pêi chiâk deăng mơ-eăm kơhnâ pêi chiâk deăng. Tơngah tiah kố klêi rôh po tơbleăng kơphế kố kô gum ki kơnía dêi kơphế kô hên tâ, kuăn pơlê pêi chiâk kô ai tơdroăng rêh ối phâi hơtôu, kro mơdrŏng tâ. Á cho môi ngế ki ối nếo, la ing mâu tơdroăng ki ton nah ƀă tơdroăng rêh ối ki khât nôkố, klêi kơ’nâi 50 hơnăm tơleăng, tơdroăng rêh ối cheăng kâ dêi kuăn pơlê pin gá hiăng pơhlêh hên khât, tơniăn lĕm tâ, rơkê plĕng tâ ƀă mơnhông mơdêk tâk’’.

‘’Ƀuôn Ma Thuột – Hâk tơngăm ƀă tơ-eăng ro” cho mâu tơdroăng klâi ki pin châ hlo tung mâu hâi khế Pái rôh tơplâ nah. Tơdế chal hiăng luâ sap ing hâi ƀlêi trâng nah lơ 10/3/1975, Ƀuôn Ma Thuột xuân ối krá rơdêi ƀă ivá hâk tơngăm Tây Nguyên. Hâi kố, a tơnêi ki ai hên khôi túa lĕm tro kố, Leh tơbleăng kơphế Buôn Ma Thuột mê hlo tơ-eăng mơngiơk, djâ vế tơdroăng hâk tơngăm ‘na pơ’leăng kơphế Tây Nguyên – tơmeăm pêi lo ing tơnêi lĕm’’, mơ-eăm tơná troh mâu kong têa tung lâp plâi tơnêi.