Klêi kơ’nâi têk nhang, kăn pơkuâ Khu pơkuâ ngăn lêng Kuân khu 7 lăm ngăn a tíu ki khu lêng tăng rôu nếo hlo tơ’nôm môi to tơnâp tung pơla po rơdâ tíu tăng rôu. Tíu kố ối a chê kơpong ki hiăng hlo, tơkŭm kơxêng kiâ mố đô̆i hdrối mê. Klêi kơ’nâi châ hlo tíu, Đô̆i K74 hiăng rak tíu ki mê, pơtroh khu lêng ƀă rơxế troh vâ tăng tiô pơkâ.

Kăn pơkuâ Kuân khu 7 pơkâ thế Khu pơkuâ ngăn lêng Pơlê kong kân Hồ Chí Minh ƀă Đô̆i K74 pơtối hriăn ngăn nhên tơnêi tíu, po rơdâ tíu tăng, pôi tá lôi tíu kơpong ki lâi nhôm. Kơxêng kiâ mố đô̆i, tơmeăm ƀă mâu tơdroăng ki nhôm tơdjâk troh vâ tăng ‘nâi, rak ‘măn, chêh ‘mot tung mơ-éa, hdró, chêh pro klêi hồ sơ, vâ xúa tung tơdroăng mơnhên inâi kơxêng kiâ mố đô̆i.