Drô troăng prôk ƀă ƀê tông kân rơdâ, krúa lĕm, pôa Y Lisa Niê, Kăn hnê ngăn Chi ƀô̆ buôn Tung Krăk, cheăm Ea Drông, kong pơlê Dak Lak ăm ‘nâi, kố cho tơdroăng ki châ môi tuăn ƀă tơdjuôm ivá dêi mâu kăn ƀô̆ veăng gum hmốu ku kŭn, xi mong, kuăn pơlê tơlo liăn rôe  prêi pro tơbăng troăng ƀă veăng tơlo liăn lối 100 hâi pêi cheăng vâ pê klêi, tơ’lêi hlâu ăm tơdroăng prôk lăm, chơ tơmeăm pê lo ing chiâk deăng ƀă veăng pơ’lêh ngiâ méa thôn pơlê.

“Ƀă hnoăng cheăng  dêi Kăn hnê ngăn chi ƀô̆, a hiăng tơpui ƀă kuăn pơlê vâ pro troăng troh tung klâng, kô xuân cho hnoăng ki pơxúa vâ kuăn pơlê châ xúa, kum tơ’lêi hlâu tung prôk lăm. A hôp kuăn pơlê, hnê tối mơhnhôk ƀă châ kuăn pơlê môi tuăn pêi pro, tơlo liăn rêm rơpŏng 600.000 rơpâu liăn, ƀă 80 rơpŏng veăng tơlo. Kơnôm ai tơ’nôm liăn kơjo kum dêi tơnêi têa mê troăng prôk hiăng pro klêi”.

Troăng ƀê tông a pơlê Tung Krăk cho môi tung mâu tơdroăng pơtih tung hriâm tâp ƀă pêi pro tiô Pôa a cheăm Ea Drông, kong pơlê Dak Lak, mơhno hnoăng cheăng pêi ahdrối, djâ troăng dêi mâu kăn ƀô̆, đảng viên tung tơdroăng mơjiâng thôn pơlê nếo a kong pơlê. Ƀă tơdroăng pleăng tơnêi ăm pro troăng ƀă mơhnhôk kuăn pơlê veăng tơlo liăn, vâi hiăng pro ăm kuăn pơlê ai tuăn loi ƀă kuăn pơlê môi tuăn dêi rơpó, kum ăm troăng prôk châ tơdjêp ƀăng.

Ôh tá xê to tung mơjiâng thôn pơlê nếo, tơdroăng hriâm ƀă pêi pro tiô Pôa a cheăm Ea Drông ối mơhno ing tơdroăng cheăng tơmâng kum mâu ngế kơtiê. Tơbleăng mâu tơdroăng pơkâ dêi tơnêi têa ‘na kơdroh kơklêa xăm kơtiê, cheăm Ea Drông hiăng ai luât pơkâ kơjo kum ăm hdrê pêt, mơjiâng pro hngêi ối, ăm mung liăn ing hngêi rak liăn kum pơlê pơla. Mâu luât pơkâ tŏng gum mê hiăng pro hlâu vâ kuăn pơlê mơnhông cheăng kâ, ‘mâi mơdêk kơxô̆ liăn pê lo. Kơnôm ing mê, kơxô̆ rơpŏng kơtiê dêi cheăm hiăng kơdroh sap 280  rơpŏng a hơnăm 2024 chu ối 214 rơpŏng tung hơnăm kố. Pôa Y San Niê Kdăm, ngế pơkuâ buôn Ea Kjoh A, cheăm Ea Drông, kong pơlê Dak Lak ăm ‘nâi:

“Mâu rơpŏng hngêi ki kơtiê xuân châ tơmâng tŏng kum ing mâu kăn kong pơlê vâ mơnhông păn mơnăn, pêt loăng plâi. Sap hơnăm 2023 tung pơlê Ea Kjoh A ai 16 rơpŏng châ kơjo kum hdrê pú pái, rêm rơpŏng ai 8 to hdrê. Vâi hiăng kơhnâ păn, mâu mơnăn păn hngâ kuăn hên. Drêng pu pái hiăng kân ‘nâi tâng tê kô ai yă mê mơpŏng hngêi  hiăng tê dêi, xo kơxô̆ liăn mê vâ xúa tung rêh ối, ‘măn kơdĭng pro hngêi,  păn rak kuăn ăm kuăn lăm hriâm. Tơdroăng rêh ối tơniăn, vâi hiăng hmiên tuăn pêi chiâk, rak vế pêi pro tro luât tơnêi têa”.

Cheăm Ea Drông nôkố châ mơjiâng pro ing tơdroăng tơ’mot péa to cheăm Ea Drông ton ƀă cheăm Ea Siên tơdjuôm, ai 21 to thôn, vâ chê 24.000 pơ’leăng mâ kuăn pơlê, tung mê ai lối 70% ngế kuăn ngo. Đảng ƀô̆ cheăm ai vâ chê 900 ngế Đảng viên tơkŭm hôp a 52 khu tơrŭm cheăng.

Ƀă tơdroăng ki nếo, hnoăng cheăng pêi ki nếo, tơdroăng hriâm tâp ƀă pêi pro tiô tuăn tơmiêt, hiâm mơno túa pêi cheăng Hồ Chí Minh chiâng trum ki mơhno troăng tung tơdroăng cheăng pơkuâ, hnê mơhno, mơhno nhên tơrêm tơdroăng cheăng pêi ăm tơrêm ngế kăn ƀô̆, đảng viên. Ngoh Hoàng Văn Dụng (kuăn ngo Nùng), kăn ƀô̆ ngăn ƀơrô Hô̆i đong kuăn pơlê, Vi ƀan kuăn pơlê cheăm Ea Drông, kong pơlê Dak Lak tối:

“Hriâm tâp ƀă pêi pro tiô troăng ki lĕm hiâm mono Hồ Chí Minh ôh tá  xê to tơdroăng tơbleăng tối tê mê thế pêi pro ƀă tơdroăng ki nhên khât rêm hâi ing tơdroăng cheăng dêi tơná pêi. Cho môi ngế Đảng viên hơnăm ối nếo, ing mâu tơdroăng cheăng, a xuân mơ-eăm xúa khoa hok công ngê̆ thông tin tung tơdroăng cheăng, đi đo po ngăn tơdroăng  nếi ai  pơ’lêh tơrêm hâi vâ teăm tơdrêng tơdroăng cheăng, mơ-eăm pê klêi tơdroăng cheăng ki châ pơcháu”.

Jâ H Thúy Mlô, Phŏ kăn hnê ngăn Đảng ủy cheăm Ea Drông, ăm ‘nâi tơdroăng pêi pro tiô tuăn tơmiêt, hiâm mơno lĕm, túa pêi cheăng Hồ Chí Minh a cheăm hiăng chiâng tơdroăng hmâ pêi pro tro tiô luât, pơ’lêh rĕng tung tơdroăng mơjiâng Đảng.

 “Tơdroăng hriâm tâp, pêi pro tiô Pôa  xuân kum mơdêk hnoăng cheăng pêi pro, tuăn ‘nâi tơmiêt ngăn dêi tơná, ‘mâi rơnêu dêi tung  râ ủy Đảng. Hên chi ƀô̆ xuân hiăng pơtối rak vế pêi tro tơdroăng ki ‘mâi rơnêu tơná, vâ mơho nhên tơdroăng ki hbrâ vâ tơplâ dêi khu tơrŭm cheăng Đảng ing mê kô veăng ‘no hnoăng mơjiâng chi ƀô̆ rế ton rế krúa lĕm, rơdêi tâ. Ƀă Đảng ủy cheăm  mê tung tơdroăng cheăng kô ai túa pêi pro tung tơdroăng hriâm tâp, pêi pro tiô tuăn tơmiêt, hiăm mơno lĕm, túa pêi cheăng Hồ Chí Minh mê xuân ai hên túa pêi cheăng. Mâu tơdroăng ki vâ tối nôkố xuân hiăng veăng kum tơdroăng ki pơ’lêh tung tâi tâng Đảng ƀô̆ dêi cheăm”.

Ƀă tơdroăng cheăng pêi nhên khât, túa pêi cheăng hriê̆n plĕng ki nếo, tung hriâm tâp ƀă pêi pro tiô tuăn tơmiêt, hiăm mơno lĕm túa pêi cheăng  Hồ Chí Minh a cheăm Ea Drông hiăng veăng mơjâng khu tơrŭm cheăng Đảng krúa, rơdêi, mơhno ki kuăn pơlê môi tuăn, mâu kăn achê kuăn pơlê, xua kuăn pơlê. Pakĭng mê tơbâ tơdroăng púi vâ mơ-eăm, ing tơdroăng tơrŭm ƀă ai pơxúa tung mơjiâng pơlê pơla rế mơnhông tơƀrê rơkê plĕng, kro mơdrŏng./.