Kơxê lơ 8/9, Vi ƀan hnê ngăn kong pơlê Gia Lai po rôh hôp mơnhên tối tơdroăng cheăng kâ rêh ối pơlê pơla khế 8. Tiô tơbleăng, chih kơxô̆ mơjiâng pro kế tơmeăm khế 8 dêi kong pơlê Gia Lai tâk 6,8% tâng vâ pơchông ƀă khế kố hơnăm nah; ôm hyô ‘mâi mơnhông rơdêi ƀă 9,8 rơtuh ngế tơmối, tâk 16%; Kơxô̆ liăn châ xo ing tê tơmeăm ngi kong têa ê châ lối 2,18 rơtal dollars, tơ’mô 3/4 túa pơcháu dêi hơnăm.

Nâp liăn 8 khế châ lối 18.395 rơtal. La tiah mê, kơxô̆ liăn xoăng pêi cheăng tơnêi a Gia Lai bu nếo châ lối 60% túa pơcháu. Hên tơdroăng tơkêa bro ối trâm hên xơpá ‘na mơéa, xo tơnêi ƀă tơdroăng pro. Hlo tơdroăng ki ai khât kố, pôa Phạm Anh Tuấn, Kăn hnê ngăn kong pơlê Gia Lai pơkâ thế mơeăm pro mâu troăng klông ki kal.

Kăm pơkuâ mâu cheăm bêng, kong pơlê kal hnê mơhno, séa ngăn tơdrêng a rêm tơdroăng tơkêa bro; chêh pro túa pơkâ xoăng liăn pêi cheăng tiô tơrêm hneăng vâ teăm tŏng gum xơpá.