VOV4.Xơ Đăng - Kơxo lơ 25/1 a Tíu pêi cheăng Chin phuh, Kăn pơkuâ ngăn Tíu xiâm Đảng, Ngế pro xiâm phŏ hnê ngăn tơnêi têa cho pôa Lê Minh Khái pơkâ thế mâu khu xiâm, kơvâ cheăng, ăm rơkong veăng tơpui tối tung kơxop hlá mơ-éa pơkâ dêi Chin phuh ‘na tơdroăng ki ‘mâi mơnhông, mơdêk cheăng kâ rêh ối pơlêpơla. Mơgêi rôh hôp, pôa Lê Minh Khái, Ngế pro xiâm phŏ hnê ngăn tơnêi têa pơkâ thế Khu xiâm pơkâ ƀă ‘no liăn cheăng tơmâng xo mâu rơkong tơpui tối mâu khu xiâm, kơvâ cheăng, chêh pro klêi kơxop hlá mơ-éa pơkâ, séa ngăn mâu ngế ki châ tŏng kum, hriăn ngăn tơdroăng ki ‘mot tơ’nôm mâu ngế ki châ tŏng kum tơtro.

Ngế pro xiâm phŏ hnê ngăn tơnêi têa pơchân, tơdroăng ki tơkŭm tơbleăng, mâu troăng hơlâ séa ngăn tơdroăng ki ai khât, séa ngăn tơdroăng mơgêi dêi Khu xiâm pơkuâ tơdroăng kal kí ƀă Tơdroăng pơkâ dêi Kuô̆k hô̆i, xua kố cho tơdroăng ki kân ƀă tâi tâng kơxô̆ liăn ‘no vâ chê 350 rơpâu rơtal liăn, hên hnoăng cheăng athế tơrŭm rơkê ƀă túa pơkâ ‘no liăn cheăng tơdjuôm ki krâ kơvâ hơnăm. Tơdroăng athế pơkâ nhên, pêi pro tro troăng hơlâ athế rak tơniăn pôi tá ăm ai tơdroăng ki pro xôi.

Katarina Nga tơplôu ƀă tơbleăng