Châ  hbrâ tơdroăng pêi pro ƀă kơxô̆, hên rơpŏng hngêi kuăn pơlê ki pêi chiâk a Lào Cai hiăng hbrâ tơbleăng tơmeăm a kơdrum tơná. Bú môi rôh livestream, mơngế ki rôe a lâp lu kô ngăn tơdroăng pêi cheăng, chêh inâi rôe tơmeăm ƀă thăm nếo chêh inâi vâ lăm ôm hyô ngăn tơdroăng pêi chiâk amê. Nâ Lù Minh Tình, ngế ai kơdrum krui quýt a cheăm Mường Khương tối:

“Môi tiah ngin hiăng đăng tung TikTok mê ai hên tơmối hiăng troh mot ngăn a kơdrum hngêi á ƀă tối yă vé mot ngăn kơdrum 30 rơpâu liăn hlối châ kâ krui quýt tung kơdrum kâ ngăn to kâi tơtro khât, ối rôe krui quýt djâ vêh mê a tê 20 rơpâu liăn 1 kĭ. Khế apoăng drêng troh rơnó hngêi a hiăng tê châ vâ chê 3 tâ̆n krui quýt”.

Tơdroăng mê ăm hlo, kơmăi kơmok dế kum pê lo tơmeăm kơpong kong ngo Lào Cai pro rế achê ki kơtăn hơngế ƀă kơchơ mơdró. Ôh ti xê to krui Quýt, hên tơmeăm pê lo ing chiâk deăng  môi tiah chếi, priât, ring rí, phái Séng Cù... xuân hiăng  tơbleăng tê “tung măng”, tơdjêp pơla mơngế ki pêt bă mơngế ki rôe. Pôa Phạm Đức Trung, Phŏ kăn hnê ngăn Vi ƀan kuăn pơlê cheăm Mường Khương ăm ‘nâi:

 “Ngin xuân hiăng mơjiâng ƀâng vâ tơdjêp ƀă hlối tê hlối hnê ăm kuăn pơlê xúa măng pơlê pơla. Apoăng mâu tơmeăm bu tê ăm to tơmối ki ối rơtâ tá Lào Cai tê la nôkố hiăng tê troh Hà Nội, Hải Phòng... kuăn pơlê xuân ai phôn râng kŏng mê tơdroăng xua măng pơlê pơla tơ’lêi hlâu ‘nâng”.

Pêi pro tơdroăng pơkâ dêi tơnêi têa 1719, Lào Cai hiăng tơbleăng hên tơdroăng kơjo kum môi tiah hnê kih thuâ̆t, pơtâp rak ngăn khu pêi cheăng tơrŭm, kơjo kum ăm mung liăn tơvêh rơkâ iâ, chêh inâi xúa tuăn ngôa rơkê ăm tơmeăm, tơbleăng tơmeăm pê lo ing chiâk deăng kong pơlê... Troh nôkố hên tơmeăm a cheăm pơlê tơkâ luâ ngo, luâ pơlê, achê kơchơ mơdró kân rơdâ tâ. Pôa Dương Tấn Nghĩa, Phŏ Pơkuâ ngăn tíu xiâm mơhno túa lĕm tro, Tơ’noăng ivá ƀă Ôm hyô kong pơlê Lào Cao tối:

“Vâi krâ nhŏng o Kuăn pơlê châ pêi cheăng ƀă kŏng ngê̆ rĕng, hên trang web, TikTok, Facebook hiăng châ xúa tơƀrê. Tơdroăng mê ai veăng kơjo kum dêi mâu tíu pêi cheăng, kơvâ cheăng, mê cho Khu xiâm khoa hok ƀă Kong ngê̆, Khu xiâm ngăn  Túa lĕm tro, ôm hyô kong pơlê. Ngin xuân hiăng xúa hên kong ngê̆ ki nếo, malối djâ tơdroăng pơ’lêh kơxô̆ troh tung kuăn pơlê, malối cho mâu hơnăm ối nếo”.

Ing chiâk deăng troh tơdroăng cheăng ƀă kơxô̆ cho hvêa prôk pơ’lêh rơdêi tuăn tơmiât pêi chiâk, tê mơdró dêi kuăn pơlê ki pêi chiâk a kơpong hơngế hơngo Lào Cai. Drêng châ kơjo kum tro tiô troăng hơlâ, kuăn pơlê kô chiâng pêi cheăng ƀă kong ngê̆,  tơbleăng rơdâ kân troh hơngế tâ. Pơ’lêh kơxô̆ dế chiâng khuă ki lôu péa mơnhông krá tơniăm pêi chiâk deăng dêi cheăm, kong pơlê.