Vêh tơbâ mâu hâi a khế 3 hơnăm ki mê nah, pôa Tô Tấn Tài, ối hmâ krếo cho Ama H’Oanh, cho Kăn pơkuâ hnê ngăn Đảng pơlê kong krâm Buôn Ma Thuột, phoih ƀriê tung i hiâm tối, pôa châ Khu kăn pơkuâ hnê ngăn Đảng kong pơlê Dak Lak pơcháu hnoăng cheăng pơkâ mơhnhôk mâu kuăn pơlê, ki rơhêng vâ tối, mâu kuăn pơlê ki rêh ối tung pơlê kong krâm roh mê nah. Ama H’Oanh tối ăm ‘nâi, drêng blong plâ Buôn Ma Thuột, khu mô đô̆i hơniâp ro ó khât, khên tơnôu há, kuăn pơlê pói rơhêng vâ châ rĕng tơleăng lĕm.

“Ngin châ tơ’lêi hlâu xua a Buôn Ma Thuột plâ tung rơxông pơplâ xâ Mih nah cho mơjiâng mâu đông ki pơkí tung pơlê kong krâm, mơngế ki cheăng xuân kơdrâm, mâu kuăn pơlê ki veăng môi tuăn xuân kơdrâm, xua Buôn Ma Thuột ki păng ‘nâng cho mâu kuăn pơlê tơkŭm lo ing mâu kong pơlê a kong tơbăng kơpong 5 hdrối nah, mê vâi cho hiăng cho lêng kăch măng xiâm rêi. Ngin tối pơtâng ăm kuăn pơlê hlê plĕng nhên, hneăng roh kố khŏm châ tơleăng lĕm, maluâ ối 1 ngế kuăn pơlê rêh ối tung pơlê kong krâm mê khu cheăng kal kí ngin xuân ối kring vế, rak ngăn kuăn pơlê akố”.

Cho ngế ki tơkŭm tơdjâ troăng lăm pro kăch măng a pơlê cheăm dêi pơlê kong krâm Buôn Ma Thuuột drêng mê nah, jâ Nguyễn Thị Minh Trinh, Phŏ pơkuâ khu cheăng kal kí hneăng mê nah tối ăm ‘nâi, khu cheăng kal kí cho ai tŭm mô đô̆i-kuăn pơlê-ngăn ‘na hnoăng cheăng Đảng, rêm kơtâo, rêm pơlê kô ai túa ki mơhnhôk hnê, djâ troăng ăm tơtro tiô hnoăng kăch măng. Maluâ ƀriê lo têa mâ pơtroh dêi kuăn ối  tơxĭn 2 hơnăm a đông kăch măng, jâ hiăng veăng mot tung khu ngăn cheăng kal kí, tí tăng hnê tơdjâ kuăn pơlê, tơrŭm cheăng, mơjiâng mâu đông dêi kăch măng, hbrâ vâ plâ hnâp khu lêng xâ.

“Mâu đông pin drêng mê nah vâi khên tơnôu ó khât, ƀă kăch măng pin roh mê nah xuân hiăng hmâ tơrŭm krá kâk ó khât. Kơnôm ti mê, á khoh châ ‘nâi mâu lêng xâ vâi pro đông ulâi, vâi gak ngăn drăng lâi, ƀă hnối axoăng tơrêm khu, rêm khu tơrŭm cheăng dêi pó; ki má môi krếo thế mâu lêng kŏng hoa têk kŏng, vêh ƀă kăch măng, ki má péa khŏm plâ hnâp, kơdê khu lêng xâ ki tơtrâ, ki má pái brôk kuăn pơlê xông pơplâ xâ. Tung pơla mê, ngin hiăng châ rup mâu ngế lêng xâ, châ kơdê vâi, ing mê, khoh châ plâ hnâp mâu đông lêng xâ ki kah kân, ƀă mơhnhôk djâ mâu kuăn pơlê tâi tâng tơrŭm xông pơplâ xâ”.

Phoih pâ mâu hâi khế ki ôh tá châ koi hlâk vâ pơchoh hlá cơ axoăng ăm mô đô̆i pro tơleăng lĕm, jâ Nguyễn Thị Ngọc Lan ƀriê lo têa mâ tối, hên ngế hiăng hlâ, hiăng tro rong vâ kring vế, rak ngăn tơrêm xơtá ché ki pơchoh hlá cơ dêi tơnêi têa. Drêng hiăng châ hlo hlá cơ chúa tung hâi Ƀuôn Ma Thuột châ tơleăng lĕm, drêng mê, tung i hiâm mơno phoih rơ-rêk xua lối kơ phiu ro, sôk suâ, pá kâ tối:

“Hâi lơ 10/3 á ối chôu vế mâu nhŏng o hrăng to lâi măng pơtối hlối, pơchoh kơhâi hnối pơchoh tá kơmăng, drêng mê nah, xúa on kơđĕng têa châu vâ  pơchoh plâ măng. Ôh ta ai kơbố ƀĕng ê tơnêi têa châ tơleăng lĕm a rơnó hơngui roh mê nah. Troh chôu phut kố vêh tơbâ xuân ối ƀriê phoih tung i hiâm, hlo dêi hlá cơ ki tơná ngin pơchoh dêi hiăng châ chúa a hâi châ tơleăng lĕm Buôn Ma Thuột”.

Tối ‘na tơdroăng ki ƀlêi trâng hơnăm ki mê nah, pôa Lê Chí Quyết, Phŏ Kăn pơkuâ hnê ngăn Đảng kong pơlê xuân pro Phŏ Kăn hnê ngăn Vi ƀan pơkuâ pơlê kong krâm Buôn Ma Thuột tối, ai 2 tơdroăng ki xiâm khoh tơ’lêi hlâu ăm tơdroăng châ ƀlêi trâng kố, ki má môi cho khu mô đô̆i ƀă kuăn pơlê tơrŭm môi tuăn dêi pó, ki má péa kuăn pơlê Xuăn ƀă Kuăn ngo môi tuăn dêi pó. Ing mê, khoh pro chiâng ai tơdroăng tơrŭm krá khât ăm 3 tơdroăng ki blong tơplâ, mê cho mô đô̆i, cheăng kal kí, kuăn pơlê. Hneăng tơplâ ƀlêi trâng Buôn Ma Thuột ga cho ai pơxúa kân khât, pro tơ’nhê tâi tâng ivá ki ó rơdêi dêi khu lêng xâ, ti dât khu lêng xâ lo hdâ ing Gia Lai, Kon Tum. Ki má péa nếo, mơhnhôk tâi tâng kuăn pơlê a Dak Lak xông pơplâ hnâp ‘nhiê khu lêng xâ ki pro đông a mâu pơlê cheăm. Pôa Lê Chí Quyết tối ăm ‘nâi, troh hâi lơ 24/3/1975, kong pơlê Dak Lak hiăng châ tơleăng lĕm tâi tâng.

“Hneăng blêi trâng pơlê kong krâm Buôn Ma Thuột cho kơnôm tâi tâng thôn pơlê pơrá xông pơplâ xâ. Hơniâp ro kân ó khât xua tâi tâng kuăn pơlê pơrá môi tuăn xông pơplâ ing 3 hnoăng cheăng, cho mô đô̆i, cheăng kal kí, lêng kuăn pơlê. Mê cho rơkong krếo thế khu lêng xâ rĕng têk kŏng pa kâi ƀlêi, pơcháu nâp dêi pháu hơnêa, rơtế ƀă kuăn pơlê plâ hnâp mâu pơkôt, mâu đông xâ, pro tơ’nhê mâu pơlê ki xâ kâng kơnâng pơkuâ, tơkéa vâ tối pro tơleăng lĕm ăm tơná kuăn pơlê”.

50 hơnăm hiăng luâ, hneăng ƀlêi trâng Buôn Ma Thuột xuân u ối tiah mê tung hiâm mơno dêi mâu ngế ki rêh ối, xông kân, xông pơlâ xâ chal mê nah, ƀă mê cho ki xiâm rêi dêi tơrŭm tơrôa krá tơniăn. Tơrŭm hiăng chiâng ivá ki ó rơdêi dêi mâu khu râ, po troăng hơlâ ƀlêi trâng a Tây Nguyên, mơjiâng chiâng troăng prôk ki kal, thăm mơdêk veăng tơplâ ƀlêi trâng hneăng tơplâ rơnó Hơngui hơnăm 1975, pro tơleăng lĕm tâi tâng peâ Hdroh, pro tơnêi têa tơrŭm chiâng môi.