VOV4.Xơ Đăng - Ối vâ chê 2 măng tĭng nếo mê troh Têt Lo hơnăm nếo Nhâm Dần 2022, kơvâ ôm hyô kong pơlê Lâm Đồng dế hbrâ rơnáu mâu tơdroăng, kế tơmeăm, mâu ngế cheăng vâ kum tro má môi ăm tơdroăng ki rơhêng vâ dêi tơmối ôm hyô.

Troh a Kơdrum Ánh Sáng Đà Lạt – tíu ki ôm hyô châ pơtih môi tiah kong plêng ki ôh tá ai khât dêi khu vâi rơxông hơnăm ối nếo a mâu hâi ki kố, mâu tơnêi tơníu hlối tơrŭm pơla on bâ eăng, tơdroăng ki chuât xơtó dêi mâu tơdrá proâ ƀă mâu mơngiơk rơ-eăng bâ pro ai hên tơdroăng ki phá tơ-ê dêi pó hiăng châ tíu pêi cheăng kố hbrâ tŭm têk, rêm tíu pơrá hiăng hbrâ rơnáu kum ăm tơdroăng ki vâ lăm ôm hyô, châ ngăn dêi tơmối.

Pôa Phan Minh Trường, kăn pơkuâ kơpong ki lăm mơnúa ngăn Kơdrum Ánh Sáng Đà Lạt ăm ‘nâi, pakĭng tơdroăng ki mơdêk ki dâi lĕm dêi mâu kế tơmeăm kum ăm tơmối, hnoăng cheăng hbrâ mơdât pơreăng COVID-19 xuân châ tíu pêi cheăng kố tơtrŏng pêi pro tiô pơkâ tơdjuôm.

“Ngin hbrâ rơnáu tŭm mâu kế tơmeăm hbrâ mơdât pơreăng ăm mâu ngế cheăng, sap ing kên pâng môh rơkong tá troh mâ nhĕng ki tât têa hế xơtĕng, kế ki truâ kŏng. Tơmối troh a Kơdrum Ánh Sáng mê pơrá châ vê ngăn ki tô a châ, pơkâ thế jíu kŏng ƀă têa kơdê pơreăng hdrối vâ lăm mot hyô ngăn. Ngin hiăng hbrâ rơnáu tŭm mâu kế tơmeăm tá túa pơkâ hbrâ mơdât pơreăng, ôh ti xê to tơbleăng tung tíu pêi cheăng me ối chêh inâi ƀă Hngêi pơkeăng bêng 8 ƀă Khu ngăn pơkeăng ƀă khăm pơlât kong pơlê Lâm Đồng nếo”.

Môi víu dêi Kơdrum Ánh Sáng Đà Lạt hiăng hbrâ rơnáu kum tơmối ôm hyô

Ôh ti xê to mâu kơpong, tíu ki lăm ôm hyô nếo, mâu tíu ki lĕm ƀă tíu troh ki hiăng hdrối nah hiăng châ ôu eăng a Đà Lạt, môi tiah: Thiền viện Trúc Lâm, Thung lũng Tình yêu, Xí Prenn, Xí Datanla, Đồi mộng mơ, Kơdrum reăng pơlê kong kơdrâm ƀă mâu tíu ôm hyô pêi chiâk deăng ƀă hên tíu ki ê xuân hiăng hbrâ rơnáu tro mâu tơdroăng, mâu ngế cheăng, tơdroăng ki tê mơdró vâ kum tơmối ki lăm ôm hyô.

Tơdroăng ki po rơdâ ‘na troăng prôk vâ pôi tá hâ ho a kơpong tíu xiâm xuân hiăng châ Vi ƀan hnê ngăn Pơlê kong kơdrâm Đà Lạt mơjiâng pro klêi

Tiô pôa Nguyễn Viết Vân, kăn pơkuâ Khu ngăn Mơhno túa lĕm tro, Tơ’noăng ivá ƀă Ôm hyô Lâm Đồng, troh nôkố, sap ing tíu ki ối pơtê tá troh hngêi ki ôu kâ, kơpong ki lăm xah hêi a pơlê kong kơdrâm pơrá hiăng châ rak tơniăn hnoăng cheăng hbrâ mơdât pơreăng COVID-19 xuân châ tơmâng ngăn. Rơtế amê, kơvâ ôm hyô hiăng tơrŭm ƀă mâu tíu pêi cheăng rĕng teăm tơdrêng mâu tíu tê mơdró ôm hyô ‘mâi rơnêu tơdrêng hlối mâu tơdroăng ki tá hâi pêi pro klêi, vâ pêi pro châ tơdroăng ki rơhêng vâ mâu tơdroăng ki rơhêng vâ hơniâp ro hơngui, ối pơtê dêi tơmối drêng troh a Đà Lạt – Lâm Đồng tung rôh Têt lo hơnăm la ngiâ.

“Tâi tâng mâu tíu ôm hyô pơrá hiăng tơbleăng hnê hriâm, hbrâ rơnáu mâu tơdroăng ki kal ai tơdjâk troh hbrâ mơdât pơreăng tiô pơkâ dêi kơvâ ngăn pơkeăng ƀă khăm pơlât. Rơtế ƀă mê, mâu tíu ki ối pơtê pơrá hiăng châ ‘mâi rơnêu, mâu kơpong tíu ki lămôm hyô hiăng châ ‘no liăn pro lĕm, mâu kế tơmeăm nếo pơrá hiăng pêi klêi, malối ai mâu tíu ki tê mơdró nếo tâ, tơ’mot tơdroăng ki tơmâng ngăn hên tâ dêi tơmối drêng troh a Đà Lạt – Lâm Đồng. Hâi xuân hiăng tơrŭm ƀă mâu tíu pêi cheăng ki ai tơdjâk ƀă Pơlê kong kơdrâm Đà Lạt vâ hbrâ rơnáu mâu kế tơmeăm, tơniăn troăng prôk ƀă pêi pro séa ngăn, hnê mơhno vâ mâu tíu pêi cheăng kum ăm tơdroăng ôm hyô hơniâp ro hơngui la ối châ rak tơniăn”

Quang Sáng chêh

Katarina Nga tơplôu ƀă tơbleăng