VOV4.Xơ Đăng - Kơ koan xiâm pơkuâ mơngế pêi cheăng kong têa ê (ối tung Khu xiâm pơkuâ cheăng pêi mô đô̆i rong râ ƀă rêh ối pơlê pơla) tối ăm ‘nâi: Klêi kơ’nâi môi pơla tro pơtê xua pơreăng COVID-19 xông tâ tú, sap hâi lơ 15/2, Đài Loan, Sinuâ lôu péa, tơdah tâi tâng mâu ngế pêi cheăng kong têa ê dêi: Việt Nam, Indonesia, Siam ƀă Philippines troh pêi cheăng. Kố cho roh tơ’lêi ăm mơngế pêi cheăng vâ troh Đài Loan, Sinuâ pêi cheăng, ƀă kơlo mơhá liăn khế dâng 20 rơtuh liăn/khế.

Drêng mot a Đài Loan, kong têa Sinuâ pêi cheăng, mơngế pêi cheăng thế pâk tŭm vaccine hbrâ mơdât COVID-19 ƀă  khăm ƀă PCR 48 chô ahdrối vâ mot a kong têa ê. Klêi kơ’nâi mot a kong têa rơlố kố, mơngế pêi cheăng thế kêi đeăng klâ kơtăn 14 hâi a hngêi ăm tơmối kâ koi ối pơtê, kơ’nâi mê pơtối khăm ngăn ivá tung 7 hâi pơtối ahdrối troh tíu pêi cheăng.

Mâu kơxô̆ liăn hlâ kơtăn a hngêi ăm tơmối kâ koi ối pơtê vâ hbrâ mơdât pơreăng COVID-19 kô xua khu ki mung mơngế pêi cheăng chêl ăm liăn. Pakĭng mơngế pêi cheăng tung mâu hngêi kơmăi ƀă kum cheăng tung rơpŏng, Việt Nam ƀă Đài Loan, Sinuâ xuân hiăng môi tuăn vâ peăng khu tơdah mơngế pêi cheăng kơvâ pêi chiâk deăng dêi Việt Nam.

A Sa Ly tơplôu ƀă tơbleăng