VOV4.Xơ Đăng - Kơxê lơ 20/9, Khu kăn ki pêi dêi hnoăng cheăng dêi Khu hnê mơhno cheăng Tơnêi têa ‘na hbrâ mơdât kâ kơluâ liăn ngân xua Đăi Tô Lâm, Ngế cheăng tung tíu xiâm kal kí, kăn phŏ pơkuâ Khu hnê mơhno tơnêi têa ‘na hbrâ mơdât kâ kơluâ liăn ngân pro kăn pơkuâ khu kăn kố hiăng ai rôh pêi cheăng ƀă Khu pơkuâ ngăn Đảng Dak Nông.

Tiô tối tơbleăng dêi Khu pơkuâ ngăn Đảng Dak Nông, hnoăng cheăng hbrâ mơdât kâ kơluâ tung pơla hdrối nah châ kong pơlê tơmâng ngăn pơkuâ, hnê mơhno ƀă pêi pro hlo tơƀrê. Nôkố Khu hnê mơhno cheăng hbrâ mơdât kâ kơluâ liăn ngân dêi kong pơlê dế séa ngăn, hnê mơhno 16 rôh, tơdroăng cheăng ki ôh tá tơniăn a kong pơlê; châ hlo ƀă pơtroh ăm kơ kŏng an séa ngăn 3 rôh ai tơdroăng ki pro pơxúa ing hnoăng cheăng dêi tơná tung pêi pro tơdroăng cheăng.

Tâ tá rôh pêi cheăng

Kong pơlê hiăng ai 31 rôh ƀă 52 ngế ki pơsăm tối, séa ngăn ‘na mâu tơdroăng ki pro xôi kâ kơluâ, liăn ngân. Tơpui a rôh pêi cheăng, Đăi tươ̆ng Tô Lâm pơkâ thế tung la ngiâ kong pơlê pơtối mơdêk pơkuâ, hnê mơhno ƀă tơkŭm pêi pro, malối cho tung la ngiâ pơtốipơkuâ, hnê mơhno ƀă tơkŭm po pêi pro, malối cho mâu tơdroăng ki kal ‘na mơdêk tâ nếo tơrŭm tung tơdroăng ki châ hlo, pơxâu phâk mâu ngế ki pro xôi, mâu tơdroăng pro xôi kâ kơluâ, liăn ngân tro tâ nếo hlê plĕng, pôu râng dêi hnoăng cheăng dêi rêm râ, khu pơkuâ hnê ngăn Đảng, khu kăn pơkuâ kong pơlê; pêi pro tro tơrŭm hơlâ tơrŭm tung rôh tơdroăng mâu ngế ki kâ kơluâ liăn ngân mơdêk rĕng tơdroăng séa ngăn, pơxâu phâk mâu tơdroăng tơtro ƀă tơdroăng ki pêi pro tơdâng tơ’mô mâu troăng hơlâ hbrâ mơdât kâ kơluâ liăn ngân.

Đăi tươ̆ng Tô Lâm tối tiah kố, tơdrêng amê ƀă tơdroăng ki mơdêk troăng hơlâ hbrâ mơdât, tăng rup mâu ngế pro xôi, mơnhông cheăng kâ rêh ối, kong pơlê kal tơmâng ngăn tâ nếo troh hnoăng cheăng kơdroh kơtiê, tŏng kum ăm tơdroăng rêh ối kuăn pơlê.

Katarina Nga tơplôu ƀă tơbleăng