Kơxê lơ 14/1, Khu xiâm pơkuâ Mô đô̆i kong pơlê Dak Lak tơkŭm po hneăng hôp tơbleăng mâu pơkâ dêi Khu xiâm pơkuâ Mô đô̆i ƀă Khu xiâm Tơbleăng tơdroăng cheăng ‘na tơdroăng vêh tơkŭm po Khu hnê mơhno tơdroăng cheăng Mô đô̆i râ cheăm, tơxâng pơkâ hnoăng cheăng tung rơxông nếo. A hneăng hôp, Kuân khu 5 hiăng tơbleăng ƀă diâp pơkâ rah xo ai hâi khế ƀă 102 ngế kăn ‘na rak hnoăng cheăng pơkuâ Khu hnê mơhno cheăng Mô đô̆i mâu cheăm, bêng tung kong pơlê Dak Lak.

Xông tơpui hnê mơhno, pôa Lương Nguyễn Minh Triết, Kăn pơkuâ hnê ngăn cheăng Đảng kong pơlê Dak Lak mơnhên, tơdroăng djâ khu kăn pơkuâ ngăn mô đô̆i veăng Khu hnê mơhno cheăng Mô đô̆i râ cheăm cho troăng pêi ki kân dêi Đảng, ai kơnâ kal  khât tung mơjiâng khu mô đô̆i krá tơniăn ó rơdêi; Pơkâ mâu kăn châ rah xo rĕng châ achê hnoăng cheăng, hbrâ ‘nâi kơpong, tơrŭm krá ƀă khu râ kăn pơkuâ hnê ngăn Đảng, khu râ kăn pơkuâ a cheăm, mơjiâng Khu hnê cheăng mô đô̆i râ cheăm krá rơdêi tâi tâng.