VOV4.Xơ Đăng - Khu râ kăn pơkuâ Kơ koan xiâm pơkuâ kơchơ tê mơdró kong pơlê Dak Lak tối ăm, drêng ai tơdroăng hên tíu tê têa châu têa kơxăng tung lâp tơnêi têa klĭng péa, pơtê tê mơdró, khu pơkuâ kơchơ tê mơdró kong pơlê Dak Lak hiăng thăm pơkuâ kơpong, séa ngăn tơdroăng tê mơdró têa châu têa kơxăng tung kong pơlê ƀă châ hlo hên tíu tê têa châu têa kơxăng klĭng péa. Ki nhên, khu pơkuâ kơchơ tê mơdró hiăng châ hlo 19 tiú tê mơdró têa châu têa kơxăng dế pơtân pơtê, pơtê tơdroăng pêi cheăng.

Dak Lak: 19 tíu tê têa châu têa kơxăng klĭng péa pơtê tê xua tâi têa châu têa kơxăng

Tung mê, ai 16 tíu tê têa châu têa kơxăng, 3 tíu tê mơdró pơtê tê xua mâu ngế tê châi tamo, ngế pơkuâ tíu tê têa kơxăng cho F1 ƀă tơ’nhê kơmăi hrik mơ’no têa châu. Mâu tíu tê têa châu têa kơxăng pơtê pêi cheăng ối a hên kơpong môi tiah mâu tơring Čư Mgar, Krông Năng, Ƀuôn Đôn, pơlê kong kơdrâm Ƀuôn Ma Thuột. Tung la ngiâ, Kơ koan xiâm pơkuâ kơchơ tê mơdró kong pơlê Dak Lak kô thăm séa ngăn tơdroăng tê mơdró têa châu têa kơxăng vâ teăm tơdrêng ai mâu tơdroăng pâ thế, pơkâ vâ tah lôi pá puât ăm mâu khu tê mơdró, tơdrêng amê rĕng châ hlo ƀă pơxâu phak kơtăng mâu ngế ki vâ pro pơxúa ăm dêi tơná, chôu ‘măn tơmeăm tâng ai.

A Sa Ly tơplôu ƀă tơbleăng