VOV4.Xơ Đăng - Vi ƀan kong pơlê Dak Lak nếo tơbleăng pơkâ pêi kơxô̆ 15 ‘na pêi pro troăng tŏng kum hnê cheăng pêi, djâ mơngế pêi cheăng vêh a tíu pêi cheăng ton, tăng cheăng pêi ăm mâu ngế pêi cheăng dêi kong pơlê vêh ing mâu kong pơlê, pơlê kong kơdrâm peăng Hdroh tơnêi têa xua tơdjâk dêi pơreăng COVID-19. Pơtối mê, pơkâ pêi vâ châ plah cho 100% mơngế pêi cheăng kong pơlê Dak Lak (dâng lối 40 rơpâu ngế) vêh ing kơpong ai pơreăng ối tung hơnăm pêi cheăng kal tŏng kum hriâm cheăng pêi, tăng cheăng pêi a kong pơlê, tăng xêh cheăng pêi lơ vêh pêi cheăng a tíu ton châ tŏng kum ing tơdroăng tŏng kum.

Dak Lak ai dâng 40 rơpâu ngế vêh ing mâu kong pơlê peăng hdroh tơnêi têa.

Tung pơla pêi pro sap apoăng hơnăm kố troh tâi hơnăm 2023, ƀă tâi tâng kơxô̆ liăn tiô tối hdrối dâng 248 rơtal liăn. Kong pơlê Dak Lak kô thăm tơkŭm po hnê mơhno cheăng pêi ăm mâu ngế pêi cheăng, pêi pro hnê mơjiâng cheăng pêi tơtro ƀă tơdroăng nôkố, tơniăn tơdroăng ki chiâng pêi; thăm hnê cheăng pêi hlối tơrŭm ƀă mâu khu tê mơdró, tiú mơjiâng pro tơmeăm khoăng tê mơdró, tơbleăng cheăng pêi ăm mơngế hriâm klêi kơ’nâi mơgêi lo hngêi trung.

A Sa Ly tơplôu ƀă tơbleăng