VOV4.Xơ Đăng - Hneăng tơ’noăng râ má pái phôh thong hơnăm 2022 rế hiăng vâ chê troh, pơreăng COVID-19 xuân tâ tú rơ-iêo, mâu hngêi trung râ má pái a kong pơlê Dak Lak dế hnê rơkê vâ pêi pro klêi tơdroăng hriâm. Malối cho tơdroăng ki hbrâ rơnáu mâu tơdroăng ki rơkê ple\ng ăm hok tro ki hriâm mơ’nui râ ăm hok tro vâ tơ’noăng râ má pái [ă rah xo mâu ngế hriâm tung mâu hngêi trung ki pơtối.

Môi hơnăm hriâm ki phá tơ-ê ƀă hên xôh thế pơ’lêh tơdroăng hriâm tâp ai drêng hriâm a lâm, ai drêng hriâm mơ’no tơdrêng tung um tiô troăng măng Internet hriâm dêi a hngêi hiăng tơdjâk troh tơdroăng hriâm tâp xuân môi tiah hiâm mơno hok tro, ki rơhêng vâ tối cho ƀă hok tro khô̆i 12. Vâ mâu vâi o hmiân tuăn, hngêi trung râ má pái phôh thong Nguyễn Bỉnh Khiêm, tơring Krông Păč, kong pơlê Dak Lak hiăng pêi pro hên troăng hnê hriâm ƀeăn ƀĕng rơkê, tơtro ƀă tơdroăng pơreăng xông tâ tú nôkố.

Tung mê, hngêi trung thăm pôu râng hnoăng cheăng dêi rêm ngế thái, cô yăo drêng tâng hnê tung lâm. Cô Nguyễn Thị Thuý, cô hnê môn hŏa hok, hngêi trung râ má pái phôh thong Nguyễn Bỉnh Khiêm tối ăm ‘nâi:

’Mơ-eăm ti tăng plĕng tơdroăng tung măng, tơdroăng hriâm kơ-êng dêi pó pơla pú hmâ, thái cô pơla mâu hngêi trung vâ kêi đeăng chôu hriâm ƀă tơniăn tơdroăng hnê hriâm ki xiâm má môi. Kơ’nâi mê ƀă rêm troăng tiô hiâm mơno dêi rêm ngế thái cô vâ mơhnhôk ăm mâu vâi o hâk vâ tung hriâm tâp tâ ƀă troăng ăm tơ’nôm điêm lơ tung mâu chôu hriâm mâu vâi o ai mâu tơdroăng xah hêi vâ mâu vâi o kơdroh ki klâi hriâm ƀă ai hâk vâ hriâm tâp tâ vâ tơniăn hneăng tơ’noăng la ngiâ mâu vâi o kơdroh trâm pá’’.

Chô hriâm tơdrêng a hngêi trung râ má pái phôh thong Nguyễn Bỉnh Khiêm, tơring Krông Păč, kong pơlê Dak Lak

Ƀă hok tro lâm 12 hngêi trung râ má pái phôh thong Lê Hữu Trác, tơring Čư Mgar, mơhé hâi khế pơtê hriâm vâ hbrâ mơdât pơreăng COVID-19 ton, laga ƀă pôu râng hnoăng cheăng, pơ’lêh nếo dêi thái cô hiăng kum mâu vâi o hmiân tuăn tâ.

O Hoàng Thị Minh Châu, hok tro lâm 12A1, tối ăm ‘nâi:

’Mâu thái cô ƀă hngêi trung pro tơ’lêi hlâu tơtro ăm mâu vâi o hriâm môi tiah hngêi trung đi đo tơmâng kơ-êng ‘na tơdroăng hriâm ƀă tơdroăng hbrâ mơdât pơreăng nếo. Mâu thái cô hnê rêm môn ƀă thái cô pơkuâ lâm mơdoh hên chôu pa kong chôu hnê vâ tiâ mâu tơdroăng rơhêng vâ ‘nâi plĕng dêi ngin o xua mê ôh tá ai ƀai ki lâi lối pá’’.

Lâp kong pơlê Dak Lak ai 59 hngêi trung râ má pái phôh thong, tung mê ai 48 hngêi trung hiăng ăm hok tro khô̆i 12 troh hriâm tơdrêng. Mâu hngêi trung ki ê xuân hriâm tiô troăng mơ’no tơdrêng tung um tiô troăng măng Internet, ki hên cho hok tro a pơlê kong kơdrâm Ƀuôn Ma Thuột ƀă tơring Krông Ƀuk.

Pôa Phạm Đăng Khoa, Kăn pơkuâ tơdroăng hnê hriâm ƀă hnê mơjiâng tuăn ngôa rơkê kong pơlê Dak Lak tối ăm ‘nâi, ngăn tiô tơdroăng pơreăng xông tâ tú a tơring, mâu hngêi trung tơkŭm po hnê hriâm tơtro, tơniăn tiô chôu hriâm, túa hriâm; tơdrêng amê tơniăn ivá ăm kăn ƀô̆, thái cô, nhân viên, hok tro. Krê ƀă hok tro lâm 12, mâu hngêi trung kal mơnhên tơdroăng hriâm tâp dêi hok tro vâ klâ xoăng tơdroăng hnê tơ’nôm ăm mâu vâi o ƀă tơkŭm hriâm tơ’nôm tơdroăng ki xiâm mâu mon tơ’noăng mơgêi.

Pôa Phạm Đăng Khoa tối:

Ngin hiăng hnê mơhno mâu hngêi trung râ má pái phôh thong mơjiâng mâu khu ko [ai vâ séa ngăn mâu khu ko [ai dêi Khu pơkuâ hnê hriâm – Hnê mơjiâng tuăn ngôa rơkê tơkŭm po mơnúa tơ’noăng ƀă mơnhên tơdroăng ki hôm dêi hngêi trung. Tơdrêng amê ing tơdroăng châ tơƀrê mê ai pơkâ tơkŭm po hriâm tâp tơ’nôm ăm mâu vâi o, tơniăn mâu vâi o hlê plĕng tơdroăng hriâm veăng hneăng tơ’noăng mơgêi râ má pái la ngiâ’’.

Hương Lý chêh

A Sa Ly tơplôu ƀă tơbleăng