Sap hâi lơ 29/9 – 1/10, a bêng Buôn Ma Thuột, Đảng ƀô̆ kong pơlê Dak Lak tơkŭm po Hneăng hôp Kăn teăng mâ roh má môi, hneăng hơnăm 2025 – 2030.

Veăng Hneăng hôp ai 449 kăn teăng mâ, teăng mâ ăm lối 137.000 đảng viên tung tâi tâng Đảng ƀô̆ kong pơlê Dak Lak. Hneăng hôp hneăng kố, Dak Lak mơjiâng Tơdroăng pơkâ troăng pêi ‘’Tơrŭm môi tuăn – Kuăn pơlê pơkuâ dêi hnoăng cheăng – Mâu Pơkâ pro tơniăn pơlê pơla – Châ tơƀrê hluâ pơkâ – Mơnhông mơdêk’’, châ pơkâ tơtêk cheăng kâ tơdâng 10,5%/hơnăm, pêi lo liăn rêm pơ’leăng mâ mơngế châ 153 rơtuh liăn/môi ngế a hơnăm 2030, kơxô̆ rơpŏng kơtiê tung kơpong hdroâng kuăn ngo kơdroh dâng 3%/hơnăm; tơdroăng mơjiâng Đảng tơmot sap ing 3 – 4% đảng viên/hơnăm, rêm hơnăm ai lối 90% khu pêi cheăng Đảng, đảng viên châ mơnhên, rah ối hdrối mơ’nui ing kêi đeăng hnoăng cheăng tơngi klêng...

Pakĭng tơdroăng mơgêi hneăng cheăng hiăng hluâ (2020 – 2025), pơkâ troăng pêi la ngiâ, hnoăng cheăng, troăng pêi ƀă tơbleăng tơdroăng pơkâ ăm hneăng hơnăm 2025 – 2030, Hneăng hôp tơbleăng mâu Tơdroăng pơkâ dêi Khu xiâm kal kí ‘na mơngế pêi cheăng pơkâ rah xo veăng Khu pơkuâ Đảng ƀô̆ kong pơlê ƀă Khu pơkuâ tơdroăng cheăng Đảng ủi hneăng hơnăm 2025 – 2030.  A Roh hôp hbrâ hdrối dêi Hneăng hôp Đảng ƀô̆ kong pơlê Dak Lak tơkŭm po a kơxê lơ 29/9, Hneăng hôp môi tuăn rah xo Khu râ kăn hnê ngăn ai 12 ngế ƀă 3 ngế veăng tung Tôh chêh tôm xo rơkong.