VOV4.Xơ Đăng - Môi hơnăm hriâm ki tơviah ƀă ki hên chôu hriâm cho hriâm tơdrêng ing troăng hyôh Internet, pro hên hok tro khu lâm 12 a Dak Lak tô tuăn ăm rôh tơ’noăng râ má pái phôh thông 2022. Vâ mâu vâi o tơniăn hiâm mơno, hmiân tuăn tung hriâm tâp, hên hngêi trung râ má pái phôh thong hiăng pơkâ tơdroăng ki rơbot tơ’noăng mơgêi ăm mâu vâi o. A hngêi trung râ má pái Lê Quý Đôn, pơlê kong kơdrâm Ƀuôn Ma Thuột, kong pơlê Dak Lak, lối 530 ngế hok tro khu lâm 12 tâi tâng hâi khế cho hriâm tơdrêng ing troăng hyôh Internet tung plâ hơnăm hriâm kố.

Hok tro Dak Lak

Vâ kum hok tro hriâm mơ’nui râ, hngêi trung hiăng tơkŭm mơnhên tối xing xoăng ivá hriâm tâp dêi rêm ngế o vâ xing xoăng, xoăng lâm ƀă ai túa pơkâ hnê tơ’nôm. Hneăng tơ’noăng râ má pái phôh thông hơnăm 2022 tiô tối hdrối kô po sap ing hâi lơ 7 troh lơ 11/7/2022. Tung tơdroăng ki ai pơreăng tâ tú rơ-iô a mâu tơring, cheăm mê hneăng tơ’noăng kố kô châ tơkŭm po tiô hên rôh ki phá tơ-ê dêi rơpó môi tiah hneăng tơ’noăng hơnăm 2021.

Troh nôkố, hên hngêi trung râ má pái phôh thong a Dak Lak hiăng hbrâ rơnáu mâu túa pơkâ ôn ăm hok tro vâ mâu vâi o loi tơngah tung hneăng tơ’noăng ƀă châ điêm hiâm má môi.

Katarina Nga tơplôu ƀă tơbleăng