VOV4.Xơ Đăng - Tơdroăng tê tơmeăm lu lêa tối chiâng xo tơvêh dêi liăn, môi tơdroăng lu lêa tê tơmeăm hiăng ai hên a kong pơlê, pro hên ngế hía liăn ƀă hiăng châ um tơvi, rơ’jíu đi đo tơbleăng rơdâ. Laga, tơdroăng lu lêa kố vêh ai nếo a pơlê kong kơdrâm Ƀuôn Ma Thuột, kong pơlê Dak Lak.

Râng a kŏng hdro kheăng ki ôh tá krêa rơmâ nếo rôe ƀă yă 650 rơpâu liăn la xúa pế nếo môi hdroh hiăng tơlêa tơlŏng a krí ki pro dêi ôh tá krêa rơmâ mê,  jâ H’Lý Niê, ối a ƀuôn Êrang, bêng Khánh Xuân, pơlê kong kơdrâm Ƀuôn Ma Thuột, kong pơlê Dak Lak pro dêi rơkong kơ’meâp kơ ‘mâ tối: ‘’Á hiăng tro hlôp vâi hêak pơloi’’.

Apoăng măng tĭng kố, to lâi ngế ngiâ méa tơviah mot tung pơlê lăm chiân ăm mâu kơtâ hlá mơ-éa chêh in tối ‘na môi Tơdroăng vâ mơnúa xúa tơmeăm ki vâ xúa pế pơchên kơchâi kâ hlối chêh tơhrâ mâu tơdroăng ki pro ăm pin chiâng rĕng loi rĕng hlôp tâng xúa ôh tá lĕm kô tơvêh liăn. 

Veăng tơmâng, hôp tơpui tơdroăng mê, jâ xo 3 túa khu tơmeăm mê cho hdro kheăng ki ôh tá krêa rơmâ, hdro ap suất ƀă hdro pế lâuh, la hâi teăm ‘’mơnúa xúa’’ tơmeăm ki mê hiăng tâi vâ chê 5 rơtuh liăn.

“ Ki apoăng vâi tơbleăng dêi hdro ki a siêu thị ôh tá hlo tê, ‘na yă akố 4 rơtuh môi. Klêi mê pôa ki mê tối 4 rơtuh môi mê  hôm ai kơbố vâ rôe há, tâng vâ rôe liăn ôh tá hía, pa iâ ah tơvêh ăn tơná pó tâi. Klêi mê troh hdro kheăng ki ôh tá krêa rơmâ mê 650 rơpâu liăn. Ôh tá tơmiât troh tơdroăng hôm cho vâi hêak pơloi lơ ôh tá hêak pơloi.

Tơdroăng mê hâi teăm klêi, á xuân hâi teăm ngăn tơmeăm hdro ki mê gá ti lâi, hâi teăm pâ gloh ngế ki tê hiăng châ kơtâu tíu ê, drêng mê nếo ‘nâi hiăng tro hlôp vâi hêak pơloi yôh”.

Nâ H'Nghiêm Niê hơ’muăn ‘na tơdroăng tro vâi hêak pơloi vâ chê 5 rơtuh liăn

Xuân cho ngế ki rôe tơmeăm a Tơdroăng pro tối mơnúa rôe xúa tơmeăm ai tơkŭm po a môi to hngêi tê mơdró kế tơmeăm tíu ôu kâ a bêng Khánh Xuân a kơxo lơ 4/10, nâ H’Nghiêm Niê, ối a ƀuôn Êrang hơ’muăn tối. Tơdroăng mê bú ăm to vâi kơdrâi, mâu kơnốu ôh tá chiâng mot. Rôh apoăng, nâ rôe mâu tơmeăm môi tiah têa măm, têa hleăng mơngeăn, kơƀŏng roh tơmeăm tâi tâng kơnâ péa pái hrĭng rơpâu ƀă  xuân châ tơvêh liăn.

Troh kơhâi dế, ai ngế tối kô tê mâu tơmeăm ƀă yă kơnâ ƀă kô xuân tơvêh liăn há ăm mơngế ki rôe. Nâ H’Nghiêm hiăng thâ vêh dêi a pơlê mung 5 rơtuh liăn vâ rôe tơmeăm, klêi mê kơdrâ hlo khu ki mê to rơxế ô tô châ vêh dêi:

“Kuăn pơlê pin tơkôm xêh ton tĭn ôh tá hlo vâi tơvêh liăn, klêi mê hlo to lâi ngế ki veăng cheăng tê ối pa rŏng, klêi mê vâi châ kơtâu tâi, vâi tăng mung mơhá mâu ngế ki piê to mâu yang hồ ‘lo ối tơkôm a bo cheăng hngêi tê mơdró tơmeăm kâ ôu Thu Hương, klêi mê xo dêi pơtâi tơmeăm châ kơtâu hdâ, liăn ôh tá tơvêh xếo’’.

Chât ngế  kuăn pơlê ƀuôn Êrang tô tuăn tro hêak pơloi vâ chê 5 rơtuh ngế

Pôa Y Hiệp Niê, Kăn pơlê dêi ƀuôn Êrang, bêng Khánh Xuân ăm ‘nâi, mâu tơmeăm ki kuăn pơlê rôe mê cho tơmeăm ki oh tá lĕm, ôh tá krá, ôh tá ‘nâi xiâm ki mơjiâng pro oh tá ta tĕm tem ăm ‘nâi tíu xiâm ki mơjiâng:

“Kŏng ti, khu mơdró ki mê hêak pơloi kơ kuăn pơlê. Kố xuân cho ƀai hriâm ăm kuăn pơlê tung pơlê. Xuân púi vâ kơ koan khu râ kơpêng, kơ koan kŏng an tơleăng mơnhên tơdroăng mê ‘’.

Pôa Nguyễn Đình Chung, Kăn hnê ngăn Vi ƀan bêng Khánh Xuân, pơlê kong kơdrâm Ƀuôn Ma Thuột, ăm ‘nâi, tâng tối tơbleăng dêi kuăn pơlê, kăn ƀô̆  cheăm bêng troh amê drêng mê mâu ki tê tơmeăm hiăng châ. Tiô ăm ‘nâi apoăng, tơdroăng ai dâng 500 ngế dêi bêng Khánh Xuân ƀă mâu cheăm Hoà Xuân, Hoà Khánh, Hòa Phú veăng. Mâu ngế ki rôe ki iâ gá 650 rơpâu liăn, mâu ki rôe hên vâ chê 9 rơtuh liăn.

Khu ki tê tơmeăm mê ai 2 ngế kơdrâi, 8 ngế kơnốu,  vâi to tung môi toăng xế kân krâ kơxô̆ 60B-04422 ƀă rơxế ô tô ki ai 16 tăng ‘nân krâ kơxô̆ 60B-52809. Hdrối mê, mâu ki mê tối dêi tơná teăng mâ kŏng ti pêi cheăng tiô rơnó ISHIBA, troh a kơpong krâm mơngế môi tiah kơchơ, bo cheăng hngêi trung, lăm xoăng vâi hlá mơ-éa in chêh thế veăng rôe mơnúa xúa tơmeăm.

Pôa Chung tối, tơdroăng tơkŭm po tơdroăng mê ôh tá tơbleăng troh mâu kăn cheăm bêng.

“Cho xôi, xua tê tơmeăm thế tiô tơdroăng pơkâ, ôh ta chiâng tơbleăng tơmeăm tê môi tiah mê. Mơhé tá hiăng klêi pêi cheăng mê hngêi tê mơdró kâ ôu xuân kơdrâ, drêng khu ki tê mơdró tơmeăm troh chu amê mung tíu vâ tơbleăng tê tơmeăm, vâi ôh tá ‘nâi tê tơmeăm klêi ƀă lôi hêak pơloi kuăn pơlê môi tiah lâi.

Nôkố peăng bêng dế hnê mơhno ăm mâu khu râ pơkuâ cheăng, tung mê ai ki xiâm cho kŏng an séa ngăn mơnhên, tŭm tơdroăng ôh tá ăm kuăn pơlê tro hlôp vâi hêak pơloi tiah mê xếo’’.

Hdro kheăng ôh tá krêa rơmâ xúa pế môi hdroh hiăng tơlêa ki pro ôh tá krêa

Hrĭng ngế kuăn pơlê a pơlê kong kơdrâm Ƀuôn Ma Thuột, kong pơlê Dak Lak tro hlôp vâi hêak pơloi troh veăng ngăn mơnúa xúa tơmeăm la ki khât gá vâi hêak pơloi tê tơmeăm. Tơdroăng ki mê ôh tá nếo la ăm hlo mâu tíu ki ôh tá vâ pro kơtăng tung răk ngăn tơdroăng tê mơdró ƀă pro tơniăn a pơlê cheăm bêng, drêng ai hlo tơdroăng mê, tơkŭm krâm mơngế la ôh tá ai ngế vâ tối ăm râ kơpêng ôh tá ai vâ mơdât teăm tơdrêng.

Công Bắc/VOV Tây Nguyên/Tơplôu: Gương