Hneăng hôp kăn teăng mâ Đảng ƀô̆ kong pơlê Dak Lak roh má I, hneăng hơnăm 2025 – 2030, tơkŭm po sap hâi lơ 29/9 troh lơ 1/10 ƀă ai 449 kăn teăng mâ ki khât păng ‘nâng, teăng mâ ăm lối 137.000 ngế đảng viên tâi tâng Đảng ƀô̆. Ƀă troăng pêi ‘’Tơrŭm môi tuăn – Kuăn pơlê pơkuâ dêi hnoăng cheăng – Mâu pơkâ rak tơniăn pơlê pơla – Châ tơƀrê hluâ pơkâ – Mơnhông mơdêk’’, kong pơlê Dak Lak mơnhên pŭn tơdroăng ki xiâm pêi cheăng ton xŏn mê cho: mơjiâng mơngế pêi cheăng, khoa hok – kŏng ngê̆, hngêi trăng troăng klông ƀă ‘mâi rơnêu mâu pơkâ thế pêi tiô.

Pôa Tạ Anh Tuấn, Phŏ Kăn pơkuâ hnê ngăn cheăng Đảng ŭy, Kăn hnê ngăn Vi ƀan kong pơlê tối ăm ‘nâi hneăng la ngiâ Dak Lak kơjo mâu tơdroăng ki châ tơƀrê hluâ pơkâ ai xiâm kối ƀă troh lâp lu, ki rơhêng vâ tối cho mơ’no liăn hngêi trăng troăng klông. Kong pơlê tơkŭm kơxô̆ liăn mơngế pêi cheăng vâ kêi đeăng mâu troăng kân ki xiâm, troăng kân ăm phêp rơxế kơtâu têi peăng mâ hâi Lo – peăng mâ hâi Lu, kơno têa kơxĭ, tơraih tơƀai ƀă mâu troăng kân ăm phêp rơxế kơtâu têi Peăng Kơnhŏng – Peăng hdroh, Buôn Ma Thuột – Vân Phong.

Rơtế amê, kong pơlê Mơdêk ‘mâi rơnêu pro mơ-éa cheăng kâ rêh ối ƀă tơnêi têa, pơhlêh nếo tơmiât pơkuâ vâ mơjiâng kong prâi tơ’lêi, tah lôi mâu pá puât ăm khu tê mơdró, mơhnhôk mơ’no liăn cheăng, mơdêk tơtêk krá tơniăn.