Pơkuâ po rôh hôp, Kăn hnê ngăn VI ban hnê ngăn kong pơlê, pôa Tạ Anh Tuấn pơkâ thế séa ngăn kơtăng tơdroăng ôh tá tơniăn dêi kong prâi, rak ngăn kơtăng tâi tâng mâu long, rơchoâ têa, mơdât plong tuk ƀă pơtroh khu lêng pêi cheăng tơdrêng, pôi tá ăm ai tơdroăng ki kơdrâ.

Tiô Đăi tă Nguyễn Văn Lĩnh, a 6 chôu kơxo lơ 5/11, Mố đô̆i gâk tơkăng kong, kong pơlê hiăng pơkâ tơdroăng ki mơdât lăm têa kơxĭ vâ rak vế tơniăn má môi ăm kuăn pơlê tơnăng ká xi xŏng ƀă mâu plong tuk. Rơtế ƀă tơdroăng ki hbrâ mơdât tơnăng ká xi xŏng a têa kơxĭ, mâu khu râ kơvâ cheăng ƀă kong pơlê dế tơkŭm séa ngăn mâu tíu kuăn pơlê ối kơpong thông, kơpong rơ-iêo tơ’lêi tro tơnêi tơhnah tơhnâp, hbrâ rơnáu mâu túa pơkâ ‘mâi xê̆n, rak vế kế tơmeăm ƀă troăng prôk ki kal.

Khu kŏng an, khu lêng, djâ troăng ahdrối tung hbrâ ví ƀă kong mê khía mơhot râ cheăm gâk, hbrâ rơnáu tŏng gum kuăn pơlê, malối cho a mâu kơpong ki mơni kô tro têa lân lu drêng kong mê kân.

Pôa Tạ Anh Tuấn, Kăn hnê ngăn Vi ƀan kong pơlê Dak Lak pơkâ thế mơdêk kơlo ki hbrâ kơchăng, tơbleăng túa pơkâ 4 tơdrêng, pôi tá chiâng tơngôu.