VOV4.Xơ Đăng - A hngêi trung Đăi hok Tây Nguyên, pơlê kong kơdrâm Ƀuôn Ma Thuột, kong pơlê Dak Lak, hiăng tơkŭm po tơdroăng pleăng mơheăm hâi tĭng pleăng mơheăm roh má 14 hơnăm 2022. Mơhé dế ai pơreăng xông tâ tú ó, hrĭng ngế sinh viên dêi hngêi trung ôh tá tô tuăn veăng pleăng mơheăm. Ƀă tơdroăng pơtroh ‘’pleăng mơheăm tŏng kum mơngế - Tơdroăng châ rêh pú ƀă á’’, tơdroăng pleăng mơheăm Hâi tĭng pleăng mơheăm roh má 14 hơnăm kố a hngêi trung Đăi hok Tây Nguyên mơhnhôk kơdrâm sinh viên veăng.

Hên sinh viên veăng pleăng mơheăm

A tíu pleăng mơheăm, khu tơkŭm po hiăng tơdah 606 tơdrong mơheăm. Hngêi trung Đăi hok Tây Nguyên xuân cho tíu troh má mơ’nui, mơgêi Tơdroăng hâi tĭng pleăng mơheăm a Dak Lak hơnăm kố. Tung vâ chê 1 khế tơdế hiăng hluâ, tơdroăng hâi tĭng pleăng mơheăm a Dak Lak hiăng tơdah vâ chê 3.500 tơdrong mơheăm, pơtroh mâu hngêi pơkeăng ƀă tíu xiâm khăm pơlât tung kong pơlê vâ tơxâng tơdroăng kal vâ mơheăm thâ pơlât ƀă pơlât ăm mâu ngế châi tamo.

A Sa Ly tơplôu ƀă tơbleăng