VOV4.Xơ Đăng - Drêng tơbâ 67 hơnăm Hâi Bok thái pơkeăng Việt Nam lơ 27/2, hâi lơ 25/2, Khu ki pêi dêi hnoăng cheăng dêi Khu pơkuâ ngăn Đảng, Vi ƀan hnê ngăn kong pơlê Dak Lak hiăng troh pôu, rơkâu kăn pơkuâ, mâu ƀok thái pơkeăng dêi Khu ngăn pơkeăng ƀă khăm pơlât, Tíu xiâm hbrâ mơdât châi tamo kong pơlê ƀă Hngêi pơkeăng kân kơpong Tây Nguyên.

A Khu ngăn pơkeăng ƀă khămpơlât, pôa Nguyễn Đình Trung, ngế cheăng tíu xiâm Đảng, kăn pơkuâ hnê ngăn Đảng hiăng tơmâng tơdroăng ki kăn pơkuâ ngăn pơkeăng ƀă khăm pơlât pơchuât hlá mơ-éa tối ‘na mâu tơdroăng cheăng dêi kơvâ cheăng khăm pơlât tung pơla hdrối kố nah. Hlo tơdroăng pơreăng COVID-19 tâ tú rơ-iêo ƀă ton, Khu ngăn pơkeăng ƀă khăm pơlât hiăng ƀă dế mơhnhôk tơlo mâu kơxô̆ liăn va pêi pro hnoăng cheăng hbrâ mơdât pơreăng COVID-19.

Kăn pơkuâ kong pơlê Dak Lak diâp reăng rơkâu Khu ngăn pơkeăng ƀă khăm pơlât kong pơlê drêng hâi Ƀok thái pơkeăng Việt Nam lơ 27/2

Nôkố, tâi tâng mâu hngêi pơkeăng, Tíu xiâm khăm pơlât tơring pơrá mơjiâng Kơpong pơlât COVID-19 vâ tơdah, pơlât mâu ngế ki tro COVID-19. Tơpui a rôh pêi cheăng pôa Nguyễn Đình Trung pơtroh rơkong rơkâu troh tâi tâng kăn ƀô̆, kong chưk, viên chưk ƀă mâu ngế pêi cheăng kơvâ ngăn pơkeăng; tơmâng xo mâu tơdroăng ki pêi pro tung mâu hơnăm hdrối mê hía nah hiăng veăng kum kal khât vâ kong pơlê pêi klêi tơdroăng pơkâ mơnhông mơdêk cheăng kâ rêh ối pơlê pơla, malối cho hbrâ mơdât pơreăng COVID-19 a kong pơlê.

Katarina Nga tơplôu ƀă tơbleăng