Pơla hơnăm 2022-2026, kong pơlê Dak Lak ai 60 tơdroăng cheăng pêi khoa hok, kong ngê̆ râ kong pơlê châ ngăn drêng hiăng klêi pro, pơcháu ư̆ng yŭng. Mâu tơdroăng ăm hlo klêi tăng ngăn hiăng châ ăm xúa tung pêi pro, ‘na pơkeăng, pơ’lêh cheăng tung măng internet, ‘măn rak xiâm gen ƀă rak ngăn ivá kuăn pơlê. Túa tơrŭm cheăng pơla Tơnêi têa, khu cheăng khoa hok ƀă khu mơdró xuân châ tơbleăng tung mâu tơdroăng tơkêa bro xúa ư̆ng yŭng môi tiah hên tơmeăm plâi sầu riêng, mơdêk pêt nhâ loăng pơkeăng, mơnúa pro hdrê pôm loăng ki nếo ƀă păn pêt kơxêt pơkeăng pá kơdâm xâp loăng kong. Laga, tơdroăng pơcháu hnê, tê mơdró ăm hlo xuân ối hên ki xơpá; luât rak ngăn, ăm liăn mơhá mâu tơdroăng cheăng pêi ‘na khoa hok ối hên ki pá tơvâ tơvân.

A rôh hôp, mâu kăn Vi ƀan kuăn pơlê kong pơlê Dak Lak pơkâ thế Khu xiâm Khoa hok ƀă kong ngê̆ pơtối tí tăng ngăn tơdroăng pêi pro, tối khât ki tơƀrê hôm dêi tơdroăng xúa tơmeăm ki pêi pro klêi hiăng séa ngăn; rah xo mâu tơdroăng ki hiăng châ tơƀrê hôm, tơngah kô chiâng vâ po rơdâ, tê mơdró, rơtế tơdroăng hriăn tăng ngăn hlối pêi pro ƀă tơdroăng kal vâ mơnhông dêi kong pơlê tiô túa hlá mơ-éa pơkâ kơxô̆ 57 dêi Khu xiâm kal kí. Ƀă mâu tơdroăng tơvâ tơvân ‘na luât, ‘na pro hlá mơ-éa, kong pơlê pơkâ thế thâ tăng ngăn nếo vâ pro kơdroh ki iâ 50% mâu pơkâ cho dêi cheăm kong pơlê cheăm.