A tíu ki dế mơjiâng pro a Kơpong Hngêi kơmăi Hoà Tâm ƀă Kơno Tuk Bãi Gốc, tơdroăng ki mơjiâng pro dế thâ rĕng, hên mơngế ki pêi. Lối chât toăng rơxế taih, rơxế tŏng rơtế ƀă hên mâu rơxế, kơmăi ki ê pơtối ‘mâi văng tơnêi tíu, pro bâ phuâng, kơtâk tơbăng lế lĕm, po troăng vâ tơ’lêi ăm khu rơxế, kơmăi mot pêi cheăng a tíu ki mơjiâng tơmeăm khoăng. Khoh chiâng ai mâu tơdroăng ki pơhlêh kố, kơnôm ing tơdroăng ki hiăng ai hnoăng rơkê kân khât, kơhnâ khât tung hnoăng văng, brp bâ phuâng tơnêi tíu.

Tiô Khu hnê mơhno tơdroăng cheăng kâ dêi Phú Yên tối ăm ngin ‘nâi, klêi kơ’nâi kơhnâ khât tung tơdroăng ki pêi pro mâu tơdroăng cheăng, tơdroăng tơkêa bro Hngêi kơmăi cheăng ‘na kơmăi Hoà Tâm hiăng pêi pro kêi hnoăng cheăng ăm mung lối 215 ha tơnêi. Tung ƀăng tơnêi ki u ối, lối chât ha tơnêi tíu hiăng châ bro văng lế lĕm, ƀă hiăng teăm châ pơcháu ăm khu mơdró kâ ki mơ’no liăn cheăng. A kơno tuk Bãi Gốc, tâi tâng tơnêi 64 ha 9 sao tơnêi xuân hiăng châ pơcháu tŭm, vâ kơ tơ’lêi ăm tơdroăng ki pơxiâm pro tiô tơdroăng tơkêa bro vâ pro mâu tơmeăm ki kal tung hnoăng cheăng a khế 9 la ngiâ. Pôa Đỗ Văn Khánh, Phŏ Kăn hnê ngăn Kŏng ti Tơlo liăn mơ’no Pêi cheăng ƀă Mơnhông mơjiâng hngêi pêi cheăng tung Hngêi kơmăi Hoà Tâm vêh mơnhên:

“Pôa Kăn hnê ngăn xuân trối Khu kăn pơkuâ hnê ngăn Vi ƀan kong pơlê xuân hiăng mơjiâng khu ki pêi dêi hnoăng cheăng thâ tơkŭm hnê mơhno, tơdjâ thế văng lế lĕm tơnêi tíu pơla hdrối kố nah xuân hiăng pêi pro krâu kơhnâ khât, rĕng thâ pêi păng ‘nâng. Khu kăn pơkuâ hnê ngăn Hoà Phát xuân tơkêa apoăng  khế 9 kô pêi pro, rak vế tơniăn tơdroăng ki hiăng châ mơnhên ‘na luât ƀă tơdroăng ki ai khât, ai khu ki hmâ pêi mơjiâng tơmeăm khoăng”.

Ôh tá xê to a Hoà Tâm, mê hnoăng cheăng văng bro lế lĕm, pro bâ phuâng tơnêi tíu xuân hiăng châ pêi pro hên a mâu tơdroăng tơkêa bro u ê. A tơdroăng ki mơjiâng pro Hồ Buôn Biếp, ối tung Tơdroăng tơkêa bro long hdoăng têa Yên Ngựa, cheăm Liên Sơn Lăk, mâu khu ki hmâ lăm troh ngăn akố xuân hiăng pêi dêi hnoăng cheăng nhên khât, tơrŭm ƀă khu pơkuâ ki ối achê mê, chêh bro kêi hô sơ ki vâ chêl thiê̆n tơnêi tíu ăm kuăn pơlê. Troh nôkố, ai lối 8 ha 3 sao 4, dêi 31 rơpŏng kuăn pơlê xuân hiăng châ chêh bro hlá mơ-éa vâ ai troăng hơlâ ki chêl  thiê̆n, tâi tâng kơxô̆ liăn ki thiê̆n mê lối 10 rơtal 600 rơtuh liăn; hneăng má 2 xuân hiăng chêh bro klêi hnoăng cheăng ki hiăng kêi ƀă tá hâi kêi, ing mê, tâi khế 8 kố ah khŏm xo tâi tâng tơnêi vâ pơcháu tơnêi ki mê mơjiâng pro tơmeăm khoăng. Pôa Nguyễn Anh Tú, Kăn hnê ngăn Vi ƀan cheăm Liên Sơn Lăk ai tối ăm ngin:

“Dế nôkố hiăng mơjiâng mâu khu ki tí tăng lăm hnê tối, cho khu ki rêm hâi trâm mâ, hnê tối kuăn pơlê. Kăn ƀô̆ ƀơrô ngăn ‘na cheăng kâ tơrŭm cheăng ƀă Tíu xiâm Rak tơnêi dêi Khu hnê mơhno Ea Kar hiăng chêh bro hlá mơ-eá ƀă troh hnê tối a tơrêm pơlê”.

Méluâ tơdroăng tơkêa bro hiăng ai ki pơhlêh, hiăng châ bro tơbăng lĕm tơnêi tíu, xua tơnêi tíu xuân ối cho tơdroăng ki kreăng, tơvâ tơvân kân má môi ăm tơdroăng ki vâ mơjiâng pro tơmeăm khoăng. Tiô Khu hnê mơhno-pơkuâ ngăn Tơdroăng tơkêa bro, mơjiâng tơmeăm khoăng, troăng hơlâ ƀă Chiâk deăng mơnhông thôn pơlê dêi kong pơlê Dak Lak, tíu ki dế pơkuâ ngăn 35 tơdroăng tơkêa bro, tung mê, ai 17 tơdroăng tơkêa bro xuân ối kreăng ‘na tơdroăng vâ xo tơnêi ƀă ‘mâi rơnêu tơdroăng tơkêa bro.

Krê hnoăng ki vâ chêl thiê̆n tơnêi tíu ối kreăng a 19 to cheăm, ing mê, tơdjâk troh hnoăng ki vâ mơjiâng pro ƀă ăm mung liă ngân. Pôa Trần Tiến Đông, Kăn hnê ngăn Khu hnê mơhno Tơdroăng Tơkêa bro mơ’no liăn cheăng mơjiâng tơmeăm khoăng ối tung Khu ngăn ‘na Troăng prôk-Rơxế kơtâu ƀă Chiâk deăng mơnhông thôn pơlê kong pơlê Dak Lak tối ăm ngin ‘nâi:

“Mâu tơdroăng tơkêa bro ối kreăng, tơvâ tơvân hên tơdroăng, xua mê, ôh tá hâi chiâng vâ ăm mung liăn ngân, ki pá má môi mê cho tơdroăng ki vâ pro lế lĕm, pro bâ phuâng tơnêi tíu. Mâu tơdroăng tơkêa bro hiăng ai tơnêi tíu ki Khu hnê mơhno dế hnê mơhno mâu khu ki kơhnâ tung pơkâ pêi pro mâu tơdroăng cheăng, tơ-uân tung pơla hyôh kong prâi tơniăn lĕm vâ mơjiâng pro, pêi cheăng plâ hâi plâ măng, thăm mơdêk rĕng vâ kêi”.

Troh hâi lơ 10/7/2026, kong pơlê Dak Lak hiăng ăm mung châ 2.921 rơtal liăn, châ lối 30% hnoăng cheăng hiăng pơcháu. Vâ pêi pro kêi hnoăng cheăng ki pêi châ to troh a 2 to kơxô̆, Vi ƀan hnê ngăn kong pơlê hiăng pơkâ thế mâu khu râ, kơvâ cheăng, kong pơlê tơkŭm lêi tah lôi mâu tơdroăng ki ối kreăng, tơvâ tơvân ‘na vê hdró, ‘na tơnêi tíu, ‘na tơdroăng chêh bro hlá mơ-eá mơ’no liăn cheăng, khu râ tơdjâk ki veăng gum ăm mung liăn cheăng ƀă kế tơmeăm xúa vâ mơjiâng kế khoăng; vêh tí tăng ngăn, mơnhên, tŏng gum pro tơ’lêi 396 tơdroăng tơkêa bro, mâu tơmeăm khoăng ki pro ối hrá; pơtối mơdêk hnoăng cheăng “tơ’lêi”, hnối rơtế pêi pro ƀă rĕng mơ’no liăn ăm mung vâ kâi châ pêi pro Hnoăng cheăng 45 hâi măng, pro lế lĕm tơnêi tíu ƀă hnối mơnhông hnoăng cheăng dêi 5 khu tung lêi tah xahpá, tơvâ tơvân tiô kơ tơrêm hnoăng tơkêa bro a tơrêm pơlê cheăm.

Ki xiâm dêi cheăng ki vâ pêi pro mê, troh tâi khế 9, kô ăm mung ki vâ iâ hlái 67% hnoăng pơcháu, troh tâi khế 12 kô châ 92% ƀă kô pêi pro kêi tơniăn hlối 100% ahdrối hâi lơ 31/1/2027. Pôa Đỗ Hữu Huy, Kăn hnê ngăn Vi ƀan kong pơlê Dak Lak tối mơnhên:

“Vêh mơnhên ngăn tâi tâng tơdroăng pơkâ hnoăng cheăng tung 6 khế mơ’nui hơnăm, vêh mơnhên tơrêm hnoăng cheăng ki xiâm dêi khế 7, khế 8 ƀă pơla 3 khế ing khế 7 troh khế 9; tơkŭm lêi tah lôi mâu tơdroăng ki ối kreăng, ối tơvâ vâ tơkŭm mơnhông cheăng. Rêm ngế kăn pơkuâ hnê ngăn athế lăm chu troh pêi cheăng khât a pơlê cheăm, mơnhên ngăn tơdroăng cheăng ki ai păng’nâng, pêi cheăng ƀă khu mơdró kâ athế krâu khât, ƀă mâu khu ki veăng mơ’no liăn cheăng, ƀă kuăn pơlê vâ lêi tah lôi mâu tơdroăng ki xahpá; hiâm mơno mê cho pơcháu hnoăng cheăng tá troh khŏm kêi, hiăng tơhrâ athế pêi pro klêi lĕm, hiăng pêi athế châ pơxúa, hôm khât”.

Ing mâu tơdroăng ki pơhlêh cheăng a mâu tíu ki dế mơjiâng pro mê troh a tơdroăng ki khŏm pêi pro klêi tung hnoăng pơkuâ hnê ngăn, tơdjâ thế, mê Dak Lak dế chôa ‘lâng pro tơlêi hlâu vâ khoh lêi tah lôi mâu tơdroăng ki ối tơvâ kreăng tung pro bâ phuâng tơnêi tíu, thăm rế pro rĕng tơdroăng ăm mung kơxô̆ liăn ngân vâ mơjiâng kế tơmeăm tơdjuôm dêi tơnêi têa. Drêng mâu tơdroăng tơkêa bro mê hiăng châ rĕng pêi pro ƀă kơxô̆ liăn hiăng châ rĕng ‘mot tung mơnhông pêi cheăng kâ, kố xuân cho ivá ki ó rơdêi, cho ki kal vâ kong pơlê kâi chiâng pêi lo péa to kơxô̆ ki tâk a’ngêi tâ, tiô hnoăng ki hiăng pơcháu pêi pro tung hơnăm 2026.