Tiô pơkâ, kơxô̆ liăn ‘no pro tơmeăm khoăng ăm tơnêi têa ing liăn ngân kong pơlê kơdroh sap ing lối 7.201 rơtal liăn chu ối lối 6.686 rơtal liăn, tơkéa vâ tối kơdroh lối 515 rơtal liăn. Peăng ki kơdroh ki hên ƀă mâu tơdroăng tơkêa bro xúa liăn ngân xúa tơnêi, pơtê mơhno ăm liăn ‘măn kơdĭng mơnhông tơnêi tung hơnăm 2025 ƀă kơdroh mâu tơdroăng tơkêa bro ôh tá ối kal ăm liăn ngân.

Kong pơlê xuân ‘mâi mơnhông nếo xiâm pêi cheăng tiô troăng kum hdrối xoăng nếo lối 167 rơtal liăn ăm mâu tơdroăng tơkêa bro kĭ pơkâ, hiăng vâ klêi ƀă mâu tơmeăm khoăng mơnhông tơƀrê. Jâ Cao Thị Hòa An, Kăn hnê ngăn Hô̆i đong kuăn pơlê kong pơlê Dak Lak pơkâ thế Vi ƀan kuăn pơlê kong pơlê ƀă mâu kơ koan pêi rĕng, pêi tro a troăng hơlâ pơkâ “6 nhên’’, tơniăn tro tiô luât liăn ngân, xo liăn ngân pêi cheăng tơƀrê, mơnhông pê lo hên tơmeăm tung kong pơlê hơnăm 2025 tiô pơkâ Tíu xiâm pơcháu; hlối pơkâ mâu kơ koan pêi pro kơtăng tro tiô luât pơkâ ‘no liăn pro tơmeăm khoăng tơnêi têa, rơtế ƀă hnoăng cheăng dêi ngế pơkuâ ƀă tơdroăng xo liăn ngân pêi cheăng.