A Roh hôp roh má 2, Khu pơkuâ Đảng ƀô̆ kong pơlê Dak Lak hiăng tơkŭm tơpui tơno ‘na mâu tơdroăng mơ’no, pơkâ pêi mơnhông  cheăng kâ - rêh ối pơlê pơla, tơniăn cheăng lêng - gâk kring 6 khế mơ’nui hơnăm 2025. Ing tơdroăng châ tơƀrê pêi pro tơdế apoăng hơnăm kố châ kơlo tơtêk lối 7%, kong pơlê châ pơkâ tơtêk plâ hơnăm châ sap ing 8% tơngi klêng, xo hnoăng liăn ngân tơnêi têa châ lối 16.300 rơtal liăn, pêi lo liăn tơdâng 80 rơtuh liăn/môi ngế tung hơnăm 2025.

Tiô pôa Nguyễn Đình Trung, Kăn pơkuâ hnê ngăn cheăng Đảng kong pơlê Dak Lak, vâ kêi đeăng mâu pơkâ, kong pơlê thế rĕng kêi đeăng khu râ kăn pơkuâ péa râ tiô troăng iâ mơngế, xêt khât, châ tơƀrê; mơdêk ivá pơkuâ, pơkuâ mâu râ, kơvâ cheăng; khu kăn ƀô̆ mơdêk hiâm mơno pôu râng hnoăng cheăng, tơkŭm pơkuâ, hnê mơhno pêi pro kơtăng mâu hnoăng cheăng, túa pêi ki xiâm.  Hneăng hôp xuân tơpui tơno, tối tung mâu tơdroăng xiâm hbrâ ăm Hneăng hôp Đảng ƀô̆ kong pơlê Dak Lak hneăng hơnăm 2025 – 2030.