A chêk kân 7 sao a thôn Đồng Giao, cheăm Ea M’Droh (Dak Lak), prếi on veăng Lý Thanh Tiền (kuăn ngo Dao) tơvâ tơvân tơdroăng cheăng ko tĕng dêi nhâ ăm ku kŭn vâ hơ’lâk ƀă kơtâk chĕm ăm chât to ro rêi. Ngoh hơ’muăn, ro mê châ pro hdrê ing péa to ro kăn xua kong pơlê gum ăm a hơnăm 2021. Kơnôm păn ro hlối pêt nhâ, rơpŏng ngoh hiăng hluăn xơpá, pro hngêi lĕm, tăng liăn dêi kuăn hriâm.

“Hdrối nah, á cho rơpŏng hngêi kơtiê, châ tơnêi têa kum ăm péa to ro mê môi to ro kơdrâi ƀă môi to ro đâi ƀă môi to pu pái kơdrâi ƀă môi to pú pái kâng, pakĭng mê ối kum hnê kih thuât păn, pêt loăng plâi vâ rơpŏng hngêi mơnhông cheăng kâ tơ’lêi hlâu. Nôkố rơpŏng hngêi hiăng hluăn kơtiê. Ngin púi vâ Đảng ƀô̆ kong pơlê Dak Lak hneăng la ngiâ pơtối kum mâu tơdroăng xăm kơtiê vâ kuăn pơlê tung pơlê ai tuăn mơ-eăm pêi cheăng kơdroh kơklêa xăm kơtiê tơniăn tung rêh ối”.

A ƀuôn Čuôr, cheăm Ea M’Droh, tíu vâ chê tâi tâng pơ’leăng mâ kuăn pơlê cho mơngế Rơđế, pôa Y Sắc Kƀuôr, kăn thôn tối, kơnôm tơmâng khât dêi Đảng ƀă Tơnêi têa, on tơhrik, têa krúa, troăng prôk, hngêi trung ƀă hngêi pơkeăng hiăng châ ‘no liăn mơjiâng pro krá lĕm. Ing tơdrơng kơdroh kơtiê, lối 120 rơpŏng hngêi châ kơjo kum pro hngêi ối, ăm hdrê pêt, hdrê păn vâ mơnhông cheăng kâ tơniăn. Nôkố ai lối 40 rơpŏng kơtiê, châ dâng 12%. Pôa Y Sắc tối:

“Ngin xuân púi vâ kong pơlê pơtối tơmâng ‘no liăn pêi cheăng kơjo kum mâu rơpŏng ki u ối ăm vai hdrê pêt, hdrê păn vâ kuăn pơlê pêi cheăng vâ hluăn kơtiê”.

Klêi tơmot rơtế ƀă Phú Yên, kong pơlê Dak Lak nôkố ai 2,34 rơtuh ngế kuăn pơlê, tung mê ai lối 1/4 ngế hdrông kuăn ngo. Pôa Y Jiê Niê, ối a cheăm Ea MDroh tối ăm ngin ‘nâi, luât pơkâ hdroâng kuăn ngo tung hneăng hdrối kố nah hiăng châ kong pơlê Dak Lak pêi cheăng rế mơnhông ai pơxúa. Pơlê rế mơnhông tơƀrê. Tí tăng ngăn hneăng hôp mâu kăn Đảng ƀô̆ kong pơlê, pôa Y Jiê - Krâ pơlê pói tơngah.

“Kuăn pơlê púi vâ Đảng ƀô̆ kong pơlê rah xo mâu ngế ki rơkê ai tuăn mơno lĕm vâ pơkuâ kuăn pơlê chông djâ kuăn pơlê pêi cheăng kro mơdróng tâ, tơdroăng rêh ối dêi kuăn pơlê phâi tơtô hơniâp ro tâ. Kuăn pơlê tung kong pơlê kô châ kơjo kum mơjiâng tơ‘nôm mâu troăng prôk, kâng rơchôa, pro hngêi trung hriâm vâ kuăn ‘nĕng châ hriâm tŭm ƀă ai cheăng pêi ”.

Hneăng hơnăm 2020, kong pơlê Dak Lak hiăng tơbleăng tơdâng mâu tơdroăng, tơkêa kơdroh kơtiê a kơpong hdroâng kuăn ngo ƀă tâi tâng kơxô̆ liăn lối 4.228 rơtal liăn. 1.866 rơpŏng châ kum hngêi ối, 5.228 rơpŏng châ kơjo kum rêh kâ ối, kơxô̆ rơpŏng săm kơtiê tơrêm hơnăm ƀă troh mơ’nui hơnăm 2025 bú ối lối 10%.

Pôa Võ Trần Quang, Phŏ kăn hnê ngăn tơdroăng kal kí ƀă mơhnhôk cheăng kong pơlê Dak Lak, ăm ‘nâi, tơdroăng pơkâ hneăng hôp 2025-2030 ai pơkâ hên cheăng kâ mơnhông tơƀrê - cheăng kâ - pơlê pơla, pakĭng mê pơtối mâu tơdroăng xăm kơtiê, malối a kơpong hdroâng kuăn ngo.    

“Đảng ƀô̆ kong pơlê xuân hiăng ‘nâi nhên tơdroăng ki kal na tơdroăng tơmâng ‘no liăn pêi cheăng châ tơƀrê dêi luât pơkâ ‘na hdroâng kuăn ngo tung hneăng ki kố tung kong pơlê. Tung mê, mơ-eăm kơdroh 2% kơxô̆ rơpŏng kơtiê xơpá tung lâp kong pơlê ƀă kơdroh 3% tung kơpong kuăn ngo tơngi klêng”.

Kuăn pơlê mâu hdroâng kuăn ngo Dak Lak loi khât, tơngah a hneăng hôp Đảng ƀô̆ kong pơlê rôh má môi hneăng hơnăm 2025 – 2030, kong pơlê kô mơnhong tơƀrê, tơdroăng rêh ối dêi kuăn pơlê kô pơtối pơlêh rơdêi.