VOV4.Xơ Đăng - Ƀă tơdroăng xo tơdroăng môi tuăn dêi kuăn pơlê, khu tê mơdró pro loăng rĕk mơnhên ki châ tơƀrê pơ’lêh pro hlá mơ-éa, kong pơlê Dak Lak pơtối thăm pơ’lêh pro mơ-éa ƀă ki xiâm cho kơdroh pro mơ-éa, kơdroh chôu, pro tơ’lêi hlâu ăm kuăn pơlê, khu tê mơdró; tơmâng rơkong tơpui dêi kuăn pơlê. Troh nôkố, mơhno tơdroăng pơ’lêh pro mơ-éa dêi Dak Lak hiăng ối má 45/63 kong pơlê, pơlê kong kơdrâm; mơhno tơdroăng môi tuăn ‘na tơdroăng kum pro mơ-éa dêi 15 tíu cheăng, kơvâ cheăng châ vâ chê 84%; mơhno tơdroăng ki môi tuăn ‘na tơdah pro mơ-éa dêi mâu tơring, pơlê kong kơdrâm tung kong pơlê châ 79%.

Kăn ƀô̆ pro mơ-éa pro ƀâng vê rơxế ăm kuăn pơlê a Tíu xiâm pro mơ-éa kong pơlê Dak Lak

Dak Lak châ pơkâ troh hơnăm 2025, mơhno tơdroăng pơ’lêh pro mơ-éa dêi kong pơlê kô ối tung khu 20/63 kong pơlê, pơlê kong kơdrâm. Vâ pêi pro châ tơdroăng kố, tơdroăng pơ’lêh pro mơ-éa châ kong pơlê pêi pro tŭm têk 6 tơdroăng xiâm: Pơ’lêh troăng pơkâ pêi; pơ’lêh pro mơ-éa; Pơ’lêh khu pêi cheăng pơkuâ tơnêi têa; pơ’lêh troăng kum tung pêi cheăng; pơ’lêh ‘na liăn ngân; mơjiâng ƀă mơnhông mơdêk Chin phuh điê̆n tưh.

A Sa Ly tơplôu ƀă tơbleăng