Tơdroăng cheăng hbrâ Hneăng hôp mâu kăn Đảng ƀô̆ kong pơlê Dak Lak rôh má 1, hneăng hơăm 2025-2030 dế chôa lâng vâ klêi. Mâu tơdroăng hnê tối dế châ tơbleăng tơdâng tơ’mô, hên túa pêi, pro tơdroăng phiu ro tung kăn ƀô̆, đảng viên ƀă kuăn pơlê. Tiô tối hdrối, hneăng hôp kô po a mơ’nui khế 9 kô. Kố cho tơdroăng kal kí khât tung vâ mơgêi hneăng hdrối, pơkâ tơdroăng vâ pêi mơnhông 5 hơnăm la ngiâ, troh hneăng hôp mâu kăn tung lâp tơnêi têa rôh má 14 dêi Đảng.

Troh nôkố, ai 106 Đảng ƀô̆ râ kơpêng tung kong pơlê hiăng pê klêi hneăng hôp. Vâ tơdroăng mê teăm tơdrêng, nhên ‘na Hneăng hôp, Khu xiam ngăn túa lê̆m tro, Tơ’noăng ivá ƀă ôm hyô tơrŭm ƀă mâu kơvâ cheăng kô tơkŭm po hôp tối tơbleăng hdrối ƀă klêi hneăng hôp.