VOV4.Xơ Đăng - Bu ối tá hâi teăm châ tơdế khế xếo cho hiăng troh a hâi Têt Lo hơnăm nếo Nhâm Dần 2022, kố cho roh ki kuăn pơlê a Dak Lak tơkŭm lăm rôe hên kế tơmeăm a kơchơ, a siêu thĭ vâ ai tơmeăm sôk ro a hâi Têt. Tơdroăng ki tơkŭm kơdrâm mơngế tung pơla ai pơreăng COVID-19 a kong pơlê kố xuân ối tơ’lêi tro trâm ƀă tơ’lêi tâ tú pơreăng. Vâ pôi tá ai tơdroăng ki tro tâ pơreăng mê, khu kăn pơkuâ ƀă mâu khu râ, kơvâ cheăng dế hbrâ mơdât mâu troăng hơlâ, hbrâ mơdât pơreăng COVID-19.

A mâu kơchơ kuăn pơlê hmâ lăm a pơlê kong kơdrâm Ƀuôn Ma Thuột, hnoăng cheăng hbrâ mơdât pơreăng xuân ối châ rak vế pêi pro kơtăng. Hlá mơ-éa pơtroh dêi Kŏng ti Tơlo liăn tê mơdró kơchơ Ƀuôn Ma Thuột, kơxô̆ ngế kuăn pơlê mot tung kơchơ hên tâ tâng vâ pơchông ƀă mâu hâi ki tiah hmâ, la hnoăng cheăng hbrâ mơdât pơreăng xuân ối châ tơtrŏng. Nôkố, kơchơ Ƀuôn Ma Thuột ai dâng 8 rơpâu ngế kuăn pơlê tê mơdró. Tâi tâng mâu ngế ki tê mơdró kế tơmeăm a kơchô pơrá châ pâk 2 trum vaccine hbrâ mơdât COVID-19.

Mâu ngế cheăng tung siêu thĭ vê ngăn ki tô drêng kuăn pơlê troh roê tơmeăm

A mâu tíu ki mot lo tung kơchơ, Khu ki rak ngăn kơchơ pơrá xing xoăng tíu vâ ‘măn têa jíu kŏng kơdê pơreăng ƀă kơ-ƀăng ki chêh dêi inâi ƀă tơdroăng ki quet mah QR ƀă mâu ngế ki xúa phôn râng kŏng ƀă chêh tối dêi inâi ƀă hlá mơ-éa ăm mâu ngế ki ôh tá xúa phôn râng kŏng. ‘Na hnoăng cheăng hnê tối, kơchơ Ƀuôn Ma Thuột ối krâm, ‘măn pa nô, áp phích ‘na hbrâ mơdât pơreăng a mâu tíu ki ai hên ngế prôk tơkâ luâ; đi đo tơbleăng tung rơ’jiu tối ‘na mâu hlá mơ-éa ki nếo, mâu tơdroăng ki hơ’lêh ‘na túa ki hbrâ mơdât pơreăng ƀă hên ki ê.

Pôa Nguyễn Duy Quảng, Ngế ki pơkuâ Khu rak ngăn kơchơ Ƀuôn Ma Thuột ăm ‘nâi:

“Hbrâ Têt âm lĭt hiăng vâ chê troh kơxô̆ tơmối kô hên tâ, luâ tâ mê nếo kế tơmeăm dêi mâu khu ki tê mơdró xuân hên tâ. Tung rôh Têt kố ngin pơtối mơ’no tung loâ tơbleăng ăm tơmối xuân môi tiah mâu khu ki tê mơdró tơmeăm hiăng mot tung kơchơ athế truâ kên pâng môh rơkong, ối kơtăn hngế ing dêi rơpó ƀă rak tơniăn hbrâ mơdât pơreăng tiô túa ki tro má môi”.

Mâu pano, chư chêh ki krâ ‘măn a tíu ki mot dêi kơchơ Ƀuôn Ma Thuột

Ƀă a mâu siêu thĭ, tíu ki tê kế tơmeăm xúa a pơlê kong kơdrâm, sap ing tíu ki mot, mâu ngế ki cheăng tung mâu tíu ki tê mơdró kế tơmeăm, siêu thĭ pơrá rak vế tơdroăng ki ối kơtăn hngế drêng mot roê kế tơmeăm. Tơdrêng a mê, mâu siêu thĭ xuân pơkâ thế tâi tâng mâu kuăn pơlê, mâu ngế cheăng tê tơmeăm truâ kên pâng môh rơkong ƀă jíu kŏng ƀă têa kơdê pơreăng tung pơla ối achê, tơpui roê kế tơmeăm.

Tiô pôa Bùi Văn Quân, Kăn pơkuâ Tíu xiâm Siêu thĭ Go Ƀuôn Ma Thuột, pakĭng tơdroăng ki hbrâ tŭm kơmăi ki vê ngăn hngíu tô a châ, têa kơdê pơreăng ƀă tíu ki chêh tối inâi ăm tơmối a tíu ki mot tung siêu thĭ, siêu thĭ đi đo hbrâ rơnáu test rĕng COVID-19 rêm măng tĭng ăm tâi tâng mâu ngế cheăng tung siêu thĭ, mâu ngế pêi cheăng. Rơtế amê, rêm hâi klêi kơ’nâi chôu ki klĭng péa, siêu thĭ pêi pro tơdroăng ki xôh pơkeăng ăm tâi tâng siêu thĭ ƀă Cloramin B vâ hbrâ mơdât pơreăng COVID-19 ƀă hên ki ê.

“Tâi tâng mâu ngế pêi cheăng drêng lăm pêi cheăng athế truâ kên pâng môh, rơkong, mâu tíu ki trâm, ối achê ƀă tơmối athế xúa nhĕng ki mơdât têa ki xơtĕng, krê ƀă mâu ki xo liăn mê siêu thĭ pơkâ thế athế truâ kế ki truâ a kŏng vâ kơdroh iâ tơdroăng ki râng liăn ing ngế ki kố ăm ngế ki tá mơni kô pro tâ tú pơreăng.

Ƀă mâu tơmối mê tâi tâng tơmối mot athế chêh tối inâi. Pakĭng mê ngin xuân ối hbrâ kơmăi ki vê ngăn ki tô hngíu ƀă tá xôh pơkeăng ăm tơmối”.

Kuăn pơlê dế quet mah QR chêh tối inâi hdrối vâ mot tung siêu thĭ

Mơnhên tối ‘na tơdroăng ki mâu kơchơ, siêu thĭ pêi pro mau troăng hơlâ hbrâ mơdât pơreăng COVID-19 a, jâ Phạm Thị Tuyết Nhung, pơkuâ Ƀơrô cheăng Y dược, Khu ngăn pơkeăng ƀă khăm pơlât kong pơlê Dak Lak, ngế ki tơrŭm khu séa ngăn tơdjâk tối:

“Ngăn tơdjuôm tâi tâng mâu tíu pêi cheăng tung pơla tơbleăng pêi pro mê ai mâu tíu pêi cheăng tá hâi tăng ‘nâi mâu hlá mơ-éa, ai mâu tíu pêi cheăng ai tăng ‘nâi laga xuân ôh tá vâ hmâng tung tơdroăng ki vâ tơbleăng pêi pro, hên kơchơ xiâm ki ai hên kuăn pơlê lăm ƀă vâi xuân tá hâi pêi pro kơtăng tâi tơdroăng ki pêi pro 5K ƀă hên tíu tung pơla tơbleăng pêi pro ối pro vâ ăm ai tê, tá hâi kơtăng. Ing rôh lăm séa ngăn kố ngin hiăng râng kŏng mơhno tơdroăng cheăng, hnê nhên vâ séa ngăn tâi tâng mâu tíu ki tá hâi pêi pro kơtăng mê ‘mâi rơnêu tơdrêng hlối ƀă klêi kơ’nâi 10 hâi khu kố kô pơtối lăm séa ngăn ƀă vêh mơnhên nếo tung tơdroăng ki klêi kơ’nâi khu hiăng lăm séa ngăn”.

Tung pơla pơreăng COVID-19 xuân dế tâ tú rơ-iô, mâu tíu ki tê mơdró kế tơmeăm môi tiah kơchơ, siêu thĭ cho môi tung mâu tíu ki rơ-iô ‘na pơreăng, Xua mê, pakĭng tơdroăng ki mâu tíu pêi cheăng athế hbrâ rơnáu pêi pro kơtăng mâu pơkâ hbrâ mơdât pơreăng, xuân kal tơdroăng ki tơrŭm dêi mâu ngế ki roê tơmeăm kơdroh ki tâ tú dêi pơreăng malối cho tung rôh Têt Lo hơnăm nếo hiăng vâ chê troh.

Nam Trang chêh

Katarina Nga tơplôu ƀă tơbleăng