VOV4.Xơ Đăng - Mơ dêk mâu tơdroăng pêi pro rơnó Hơngui pleăng hnoăng cheăng pêi hơnăm 2022 va kum ăm kuăn pơlê ki xơpá ai tơ’nôm xah ro rơnó hơngui, tơdah Têt. Kố cho môi tung mâu tơdroăng cheăng châ pơkâ a hneăng hôp mơgêi tơdroăng cheăng đoân ƀă tơdroăng mơhnhôk mâu vâi o pơxiâm xông kân hơnăm 2021 tơbleăng tơdroăng cheăng pêi hơnăm 2022 dêi khu pơkuâ ngăn Đoân droh rơtăm kong pơlê Dak Lak po lơ 17/1.

Hơnăm ối nếo Dak Lak mơdêk tơdroăng pêi pro Rơnó hơngui pleăng hnoăng tơná vâ rêm ngế châ kâ Têt

Tiô tối dêi Khu pơkuâ ngăn Đoân droh rơtăm kong pơlê Dak Lak, tung hơnăm nah, tơdroăng tŏng kum plâ mơdât pơreăng COVID-19 châ khu hơnăm ối nếo Dak Lak tơrŭm ƀă tơbleăng. Ing mê, mơhnhôk ƀă rêm râ xing xoăng hrĭng to kên pâng môh rơkong, têa pơkeăng, nhĕng tât têa hé tro xơtĕng ƀă hmân ếo pơkeăng ƀă tâi tâi mê kơnâ lối 1 rơtal liăn. Lâp tung kong pơlê hiăng kum vâ chê 24 rơpâu Tơdrong kơxu tơmeăm ƀă tơdrong tâ pơkeăng ăm kuăn pơlê ƀă mâu vâi o, vâi droh rơtăm ki kơtiê xơpá, ƀă tâi tâng kơxô̆ liăn vâ chê 6 rơtal liăn.

Tơdrêng amê, rêm râ khu ngăn Đoân droh rơtăm tung kong pơlê hiăng pêi pro vâ chê 2.700 tơmeăm khoăng, tơdroăng cheăng dêi mâu ngế droh rơtăm; Mơjiâng nếo lối 119 km troăng  “eăng bâ- hyôh lĕm- krúa lĕm - rơkê - tơniăn” ; tơkŭm hnê tối, hnê cheăng pêi ƀă tơbleăng cheăng pêi pro ăm chât rơpâu ngế đoân viên droh rơtăm; veăng kum hrĭng túa cheăng dêi mâu drog rơtăm pêi cheăng kâ, pơxiâm tăng cheăng pêi.

Gương tơplôu ƀă tơbleăng