Tơpah khế hdrối kố nah, kơlo kơxô̆ mơjiâng pro tơmeăm ƀă kơmăi kơmok dêi Dak Lak tâk vâ chê 14% tâng vâ pơchông ƀă khế kố hơnăm nah; tung mê, kơmăi kơmok uâ pơliê, mơdiê, mơjiâng pro kế tơmeăm tâk vâ chê 15%, mơjiâng pro ƀă tê on tơhrik tâk lối 12%. Vâ veăng gum pêi châ tiô pơcháu, pêi thăm mơnhông tâk sap ing 10% tơngi klêng, Dak Lak pơkâ pêi kơlo kơxô̆ mơjiâng pro kế tơmeăm ing kơmăi kơmok 5 khế mơ’nui hơnăm tâk vâ chê 20%.

Pôa Đỗ Hữu Huy, Kăn hnê ngăn Vi ƀan kong pơlê Dak Lak ăm ‘nâi, kong pơlê kô tơkŭm rak vế mơjiâng pro mâu hngêi kơmăi on tơhrik ki ai pơxúa, lêi tah mâu tơdroăng ki xơpá tung chêh pro hlá mơ-éa vâ ăm mâu tơdroăng tơkêa bro nếo mot pêi cheăng tung hơnăm kố, hlối mơdêk rơdêi uâ pơliê mơdiê trâu rơdâ ƀă tơ’mot cheăng kơmăi kơmok chal nếo, kơmăi kơmok vâ xúa ki ê ƀă logistics.

“Ngin mơdêk rơdêi mâu tơdroăng tơkêa bro cheăng kơmăi kơmok nếo tung hnoăng cheăng hơnăm 2026 kố. Pơhlêh rơdêi chiâng uâ pơliê trâu rơdâ, mơdêk ki kơnía xuân môi tiah mơjiâng inâi ‘na kế tơmeăm pêi lo ing chiâk deăng; Tơ’mot, rah xo mâu tơdroăng tơkêa bro xúa kơmăi kơmok chal nếo, kơmăi kơmok xúa ki ê hía, mê nếo cheăng kâ tâ tá tro ƀă tơdroăng pơkâ dêi logistics. Ngin kô pơtối rak tơniăn mơ’no tŭm on tơhrik, tơrŭm krá tơniăn vâ pro bâ lĕm mâu tơdroăng tơkêa bro on tơhrik vêh pro dêi kong pơlê, ƀă kô tơhrâ séa ngăn pêi pro tro mâu troăng hơlâ ‘no liăn cheăng malối cho mâu tơdroăng tơkêa ki ôh tá trâm tơvâ tơvân klâi troh tơnêi kong”.

‘Na on tơhrik, kong pơlê Dak Lak hiăng môi tuăn pêi tiô troăng hơlâ ‘no liăn cheăng ăm 19 tơdroăng tơkêa ƀă tâi tâng ki têi lối 1.217 MW; 4 toăng hngêi kơmăi on tơhrik kơtâu ƀă khía, tâi tâng ki têi 200 MW hiăng ăm xúa. Dak Lak pâ thế Khu xiâm ngăn kơmăi kơmok ƀă tê mơdró tŏng gum thăm mơ’no on tơhrik vêh pro tung Túa pơkâ on tơhrik VIII ‘mâi rơnêu, mơjiâng pro on tơhrik kơtâu ƀă khía tung têa kơxĭ ƀă mơdêk rĕng mơ’no on tơhrik.

Pôa Trương Thanh Hoài, Phŏ ngế xiâm ngăn kơmăi kơmok ƀă tê mơdró mơnhên tối, Dak Lak ai hlâu ‘na on tơhrik, kế tơmeăm pêi lo ing chiâk deăng la kal môi tơdroăng pơkâ pêi tung la ngiâ mơjiâng pro nếo, tơkŭm kơxô̆ ƀăng tơnêi tơníu peăng mâ hâi Lâ ƀă peăng mâ hâi Lo; tung mê peăng mâ hâi Lâ mơjiâng pro kơmăi kơmok uâ pơliê kế tơmeăm, ƀă peăng mâ hâi Lo chiâng vâ tơkŭm kơmăi kơmok mơjiâng pro kế tơmeăm ƀă tê on tơhrik.

“Kơpong peăng mâ hâi Lo cho tíu ki mơ’no hên on tơhrik, la peăng mâ hâi Lâ gá mơjiâng pro on tơhrik hên. Mê tơmiât vâ pro tiah lâi pơhlêh mâu tíu cheăng ƀă kơmăi kơmok a peăng mâ hâi Lo vâ tê kơdroh môi iâ on tơhrik ki mơjiâng pro on tơhrik peăng mâ hâi Lâ. Ki kố kal môi tơdroăng cheăng pêi tung la ngiâ môi tơníu mơjiâng pro nếo, á tơmiât kong pơlê athế ai rơkong tiâ mơnhên troăng prôk tung pơla troh hơnăm 2030 ƀă hnoăng cheăng pêi troh hơnăm 2035 -2045”.

Phŏ ngế xiâm ngăn kơmăi kơmok ƀă tê mơdró xuân pơkâ thế Dak Lak khên tơnôu tung pơhlêh tơ’lêi hlâu ‘na chêh pro hlá mơéa vâ ‘no liăn pêi cheăng, malối mâu tơdroăng tơkêa bro on tơhrik; tơdrêng amê hlối mơdêk rĕng mâu tơdroăng ki mơ’no on tơhrik ki kal. Khu xiâm ngăn kơmăi kơmok kô tí tăng ‘nâi plĕng vâ tơbleăng tối ăm Chin phuh troăng hơlâ ki pêi pro pơhlêh, ‘no liăn pro tiô túa BOT ƀă mâu troăng ki mơ’no on tơhrik vâ mơhnhôk tơ’nôm kơxô̆ liăn veăng ‘no ing liăn ngân ki ê.