Sap ing kơxo má, kơdrâm kuăn pơlê cheăm Hòa Thịnh ƀă mâu cheăm ki achê hiăng ai mâ a Um meăn tơbâ vâ pơ’lâng mâu mô đô̆i. Mâu tơdroăng rup kŏng, mâu tơdroăng ki kuâ dêi pó ƀă mâu têa mâ hiăng chiâng môi roh pơlâng pêng păm rơrêk tung hiâm mơno, mơgêi klêi kơ’nâi péa khế khu mô đô̆i kuăn pơlê rơtế dêi pó mơjiâng pro hngêi klêi kơ’nâi roh têa lân lu sap nah tá chói ai. Châ hlo tơdroăng ki mê sap ing kơxo má, cô Nguyễn Thị Hồng Nhi, cô yăo Hngêi trung mâm non Hòa Thịnh - tíu đông mô đô̆i pơtân dêi mâu đông mô đô̆i, xuân cho tíu tơdjêp tuăn pâ pơla thái cô, hok tro ƀă mâu ngế lêng, rơrêk tung hiâm mơno tối:

‘’Tung pơla kăn ƀô̆, mô đô̆i ối a hngêi trung mê ai gum hên ‘nâng, tơpui tơno ƀă mâu vâi o hok tro, mâu cô xuân hâk mâu mô đô̆i, nôkố pơlâng mâu tăm mô đô̆i khéa pâ ‘nâng. Hâi kố, cho hâi má mơ’nui xuân trâm mâu tăm mô đô̆i, nôkố mâu tăm mô đô̆i hiăng vêh rơhĭng rơhối, a mâu kơchơ mơdró tơmeăm xuân ôh tá hlo mâu tăm mô đô̆i, a mâu troăng kân xuân rơhĭng ôh tá châ trâm mâu tăm mô đô̆i xếo, la ngiâ ah mơni kô pâ ‘nâng. Tung pơlê đi đo pâ vế hnoăng dêi mâu tăm mô đô̆i ƀă mâu lêng’’.

Cho môi tung mâu đông ối veăng gum pơlê ing mâu hâi apoăng kong mêi têa kân lân lu, Trung ŭi Phan Ngọc Dân, Trung đoân 584, Khu xiâm pơkuâ Mô đô̆i kong pơlê Dak Lak, tối ăm ‘nâi đông rế pêi hnoăng cheăng rế gum kuăn pơlê, rế rơnêu kế tơmeăm khoăng ƀă vêh mơdâng mâu hngêi kum kuăn pơlê kơpong têa lân lu:

‘’Hâi kố tung chôu phut pơ’lâng, kuăn pơlê hiăng xông koi ing 5 chôu vâ pế kâ, ngin o kâ kơxo, klêi kơ’nâi kâ hmê vâi krâ kuăn pơlê krôu hên ‘nâng, ôh tá khên lăm akố vâ pơ’lâng xua mê á tâ rơrêk tung hiâm mơno hên ‘nâng. Drêng vêh đông lêng ngin, á ƀă mâu vâi pú ối a kố kô pâ mâu hâi khế tơrŭm ƀă kuăn pơlê tíu kố tơkâ hluâ roh kong mêi têa kân lân lu kố vâ vêh mơjiâng tơdroăng rêh ối ăm kuăn pơlê’’.

Sap ing hâi lơ 1/12/2025 troh hâi lơ 10/1/2026, lối 204 rơpâu roh kăn ƀô̆, mô đô̆i Kuân khu 5, Khu xiâm pơkuâ Mô đô̆i kong pơlê Dak Lak ƀă khu lêng kuăn pơlê ƀă vâ chê 6.000 toăng kơmăi kơmok, rơxế châ pơtroh pêi cheăng, tơkŭm po chiâng 331 khu, mơjiâng pro 331 toăng hngêi gum mâu rơpŏng tro tơhnâp hngêi tâi tâng ƀă rơnêu 90 toăng hngêi tro tơ’nhê râ a 13 cheăm, bêng.

Rơtế amê, mâu khu hiăng cheăng tơrŭm xĕn dâng 11.300 rơpŏng ƀă lối 36.000 ngế troh tíu tơniăn; xĕn 207 hngêi trung, 42 hngêi pơkeăng cheăm, 281 hngêi mơhno khôi túa lĕm tro, 38 tíu pêi cheăng Vi ƀan cheăm kuăn pơlê; rơnêu lối 50 km troăng klông ƀă gum lối 3.500 rơpŏng kuăn pơlê mơgrúa hngêi trăng, tơniăn tơdroăng rêh ối. Krê kơvâ troăng klông, rơchôa hno têa gum tung pêt mơjiâng tơmeăm rơnó xeăng tô, mâu đông lêng hiăng pro 50 tôh, 98 tíu, kêi đeăng lối 63.220 met tơmeăm khoăng.

Pôa Đào Mỹ, Phŏ Kăn hnê ngăn Vi ƀan kong pơlê Dak Lak tối rơdêi mâu tơdroăng veăng gum kân dêi khu mô đô̆i tung plâ hâi khế hbrâ ví ƀă rơnêu tơmeăm khoăng xua kong prâi pro:

‘’Um méa mô đô̆i rơtế ƀă kuăn pơlê pin rêh ối tung tơdroăng mơhé pá puât to kéa lâi laga pêng păm tuăn pâ kuăn mơngế pơla khu lêng kuăn pơlê. Mê cho mâu um méa, mâu tơdroăng tuăn pâ ki lĕm. A teăng mâ khu râ kăn pơkuâ kong pơlê mơnê hên, tá hiâm mơno troh kăn ƀô̆ mâu mô đô̆i tung khu mô đô̆i tối tơdjuôm ƀă kuăn pơlê tối krê tung péa khế hiăng hluâ ƀă ki rơhêng vâ tối cho ‘’Tơdroăng pro hngêi Quang Trung’’ ƀă hâi kố pin ối akố vâ pơ’lâng dêi pó.’’

Mơgêi roh leh, Đăi tă Cao Văn Mười, Phŏ tơbleăng tơdroăng kăn pơkuâ Kuân khu 5 mơnhên ‘’Tơdroăng mơjiâng pro hngêi Quang Trung’’ ôh tá xê to djâ ăm mâu toăng hngêi krá kâk, mê ối lôi ăm môi tơmeăm kơnía hiâm mơno pâ dêi pó hên ‘na tuăn pâ khu mô đô̆i kuăn pơlê, ‘na ivá ó rơdêi dêi hiâm mơno tuăn pâ ƀă khu tơrŭm cheăng:

‘’Rêm tơmeăm, rêm toăng hngêi pêi kêi đeăng ôh tá xê to tơmeăm mê ối cho um méa dêi tơdroăng ki loi tơngah, dêi khu mô đô̆i kuăn pơlê ôh tá kâi hía, cho tơdroăng ki hơtô dêi tuăn pâ kuăn pơlê cho rơkong mơnhên tíu lâi kuăn pơlê trâm pá tíu mê ai mô đô̆i. Tơdroăng mơjiâng pro hngêi Quang Trung hiăng mơgêi hiăng pơtối khôi túa khu lêng kuăn pơlê ing kuăn pơlê mê chiâng ai, xua kuăn pơlê mê gum dêi Mô đô̆i Pôa Hồ, chêh tối tơdroăng rơhdruê rơxông hơniâp lĕm; mơnhên ivá ó rơdêi dêi khu tơrŭm môi tuăn, tơdroăng ki veăng dêi khu cheăng kal kí ƀă kuăn pơlê. Tơdroăng mơjiâng pro hngêi Quang Trung hiăng mơgêi lôi ăm mâu tơdroăng ki tơbâ tuăn pâ kuăn mơngế, mâu toăng hngêi krá kâk ƀă ki rơhêng vâ tối tuăn pâ khu mô đô̆i kuăn pơlê thăm krá kâk’’.