Tiô tối tơbleăng, tung lâp kong pơlê Dak Lak ai 2.573 toăng plong tuk chêh inâi; tâi tâng mâu plong tuk châ hdró tiô pơkâ. Kơxô̆ plong tuk ki châ hbru ăm mơ-éa phêp tơnăng châ lối 94%; krê plong tuk sap ing 15 met tơngi klêng châ lối 98%. Kơxô̆ mơ-éa mơnhên tơniăn ‘na kih thuât châ lối 95%, tơniăn kế kâ 98% ƀă 100% plong tuk lối 15 met hiăng châ krâ ‘măn kế ki séa ngăn tung pơla tơnăng. Khu ki ai tơdjâk chêh inâi plong tuk ki ôh tá châ tŭm tơdroăng tơnăng, xing xoăng thế tot tơkŭm, mơdât kuăn pơlê tơnăng mot lo ƀă pơcháu ăm kăn pơkuâ cheăm séa ngăn tíu tot 100%; khŏm pôi tá ăm plong tuk lo ing kơno drêng tá hâi pêi pro klêi hồ sơ tơdrêng amê hlối thăm mơnhông tơrŭm gâk kring, rak ngăn kuăn pơlê tơnăng, kŏng an tung séa ngăn tơdroăng nôkố.

Pôa Lương Nguyễn Minh Triết, Kăn pơkuâ hnê ngăn cheăng Đảng Dak Lak pơkâ thế thăm mơnhông mâu ngế cheăng ăm khu ki tơnăng ká xi xŏng, pêi pro pơhlêh troăng hơlâ séa ngăn mâu plong tuk ƀă mơdêk rơdêi tơdah xo mâu tơdroăng tơpui tối pâ thế ing kuăn pơlê vâ ‘mêng rơnêu túa pơkuâ ngăn ăm tơtro ƀă tơƀrê.