Kơxê lơ 23/10, a Rôh hôp má 2 Khu pơkuâ hnê ngăn cheăng Đảng Dak Lak, pôa Lương Nguyễn Minh Triết, Kăn pơkuâ hnê ngăn cheăng Đảng tối nhên pơkâ thế mơnhên nhên hnoăng cheăng ki kal, mơhno mâu tơdroăng ki mơnhông dêi hneăng cheăng hơnăm 2025 – 2030. Pơchuât tơbleăng a rôh hôp mê ăm hlo, sap ing apoăng hơnăm troh nôkố, GRDP dêi kong pơlê tâk vâ chê 7%; tâi tâng kơxô̆ liăn châ xo ing tê tơmeăm ngi kong têa ê châ lối 2,3 rơtal USD, tâk 37,8% tâng vâ pơchông ƀă khế kố hơnăm nah. Tâi tâng kơxô̆ liăn nâp tiô riân châ vâ chê 13 rơpâu rơtal liăn, tơ’mô 97% tơdroăng pơkâ Tơnêi têa pơcháu.

Khu pơkuâ hnê ngăn cheăng Đảng môi tuăn chêh pro Tơdroăng pêi pro dêi Hneăng hôp tiô hiâm mơno “6 nhên: nhên tơdroăng pơkâ pêi, nhên tơdroăng cheăng, nhên mơngế, nhên hnoăng cheăng pôu râng, nhên hâi khế ƀă nhên kế tơmeăm pêi lo”. Kăn pơkuâ hnê ngăn cheăng Đảng Dak Lak pơkâ thế mâu tíu pêi cheăng rĕng pêi pro klêi ‘mâi pơhlêh túa pơkâ kong pơlê, séa ngăn inâi tơdroăng tơkêa bro ki châ kơjo gum, kơxô̆ liăn pro. Tung mê, mơjiâng troăng prôk ing kong – têa kơxĭ drô troăng kân 29 châ tối cho tơdroăng ki tơkêa ki kal, cho tơdroăng ki xiâm dêi hneăng.