Cheăm Ea Bá klêi kơ’nâi tơmot chiâng môi kân rơdâ 130 km karê, pơ’leăng mâ mơngế lối 8.300 ngế, tung mê dâng 60% cho hdroâng kuăn ngo Rơđế. Tíu xiâm pro mơ-éa rêh ối cheăng kâ ƀă tơnêi têa kơtăn tíu xiâm kong pơlê Dak Lak dâng 130 km. Pôa Nguyễn Hoài Vũ, Kăn pơkuâ hnê ngăn Đảng ŭy cheăm, tối: sap hâi lơ 1/7 troh nôkố, mơhé hngêi trăng troăng klông châ xúa ing péa tíu pro mơ-éa rêh ối cheăng kâ ƀă tơnêi têa cheăm ton làa xuân pêi pro châ 80% mơ-éa rêh ối cheăng kâ ƀă tơnêi têa tơdrêng tung um tiô troăng hyôh măng tŏng gum kăn pơlê ƀă lối 90% mâu roh hôp mơ’no tơdrêng tung um tiô troăng hyôh măng ƀă Tĭnh ŭy, Viƀan kong pơlê, mâu khu, kơvâ cheăng. Kố cho tơdroăng mơ-eăm kân dêi tâi tâng kăn ƀô̆, nhân viên Đảng ŭy ƀă Viƀan cheăm. Pôa Vũ tối ki nhên mâu mâu tơdroăng pâ thế ‘na pơhlêh xúa kŏng ngê̆ a cheăm:

‘’Xua cheăm cho tíu kơpong hơhngế pá puât khât ‘nâng, hngêi trăng troăng klông tá hâi tơniăn lĕm, kơmăi kơmok kế tơmeăm dêi péa tíu cheăng ton hmâ tơkŭm xuân tá hâi tơdâng tơ’mô; ivá khoa hok kŏng ngê̆ dêi nhŏng o kŏng chưk, viên chưk tá hâi hôm khât. Ngin pói vâ kong pơlê rĕng tơmâng mơ’no liăn pro, kêi đeăng tâi tâng  kơmăi vi tĭnh, po mâu lâm hnê xúa kŏng ngê̆ ăm kŏng chưk xúa kơmăi tĭnh chiâng rơkê, kŏng ngê̆ thông tin, troăng xúa AI vâ tơxâng tơdroăng kal vâ hnoăng cheăng tung rơxông nếo’’.

Môi tiah mê, cheăm Ea Hiao xuâ cho cheăm kơpong hơhngế hơhngo dêi kong pơlê Dak Lak drêng kơtăn tíu xiâm pro mơ-éa rêh ối cheăng kâ ƀă tơnêi têa kong pơlê lối 100 km. Pôa Phạm Văn Đảng, Kanw hnê ngăn Viƀan cheăm, tối: a Tíu xiâm pro mơ-éa rêh ối cheăng kâ ƀă tơnêi têa dêi cheăm, lối 65% mơ-éa rêh ối cheăng kâ rêh ối ƀă tơnêi têa ƀă lối 90% roh hôp dêi cheăm ƀă râ kơpêng châ pêi pro tơdrêng tung um tiô troăng hyôh măng. Laga, xua kơmăi kơmok tá hâi tơdâng tơ’mô, hên mơ-éa xuân tro kreăng, mâu roh hôp tơ’lêi tot tơdé rá, pôa pâ thế kong pơlê rĕng mơ’no liăn cheăng tơdâng tơ’mô. Pôa Đảng tối ăm ‘nâi:

‘’Klêi kơ’nâi roh hôp mơ’no tơdrêng tung um tiô troăng hyôh măng ki păng ‘nâng a cheăm ƀă Tĭnh ŭy, Viƀan kong pơlê, mâu khu cheăng, kơvâ cheăng mê hên roh tơdjêp troăng măng ôh tá tơniăn lĕm. Ngin pêi cheăng a cheăm pói vâ troăng măng kal thế tơdjêp đi đo, ôh tá tro tot tơdé rá. Hên xôh dế hôp, kăn kơpêng hnê mơhno trâm troăng măng ôh tá tơniăn hlo um mê ôh tá tâng rơkong tơpui ƀă tơrôu, ngin thế krếo phon vêh kơ-êng. Cho mơdoh hên chô, ivá. Pói vâ kong pơlê mơ’no liăn pro troăng măng tơniăn lĕm, măng tơniăn păng ‘nâng, vâ hôp xuân tơ’lêi, pêi pro mơ-éa xuân rĕng’’.

Trung tă Phạm Việt Hùng, Kăn pơkuâ Viettel Dak Lak, tối ăm ‘nâi tíu pêi cheăng dế tơrŭm ƀă Viƀan kong pơlê pêi pro hên tơmeăm pơhlêh xúa kŏng ngê̆. Ƀă hngêi trăng troăng klông kum pro mơ-éa rêh ối cheăng kâ ƀă tơnêi têa a râ cheăm, mê apoăng cho hiăng tơniăn lĕm, laga xua kơpong kân rơdâ, hên kơpong cho kơpong a’nâi xua mê hyôh măng ôh tá dâi lĕm, kal mơ’no liăn tơ’nôm mâu trăng mơ’no hyôh măng (Trăng mơ’no hyôh măng phôn) vâ tơniăn tơdjêp.

‘’Tung tơdroăng tơmot chiâng môi kong pơlê ƀă po rơdâ pêi pro Tơdroăng pơkâ 57, Viettel Dak Lak hiăng ƀă dế kơ-êng ăm Viƀan kong pơlê pêi pro tâi tâng tơdroăng pơhlêh xúa kŏng ngê̆ kơxô̆. Pakĭng mê, tơbleăng ƀă pêi pro mâu kơmăi kơbong hôp ôh tá êa kal mơ-éa, pro tơniăn troăng hôp tung troăng măng ƀă kơbong hôp ing phân mêm eOffice’’.

Pôa Bùi Thanh Toàn, Kăn pơkuâ Khu pơkuâ ‘na Khoa hok ƀă Kŏng ngê̆ kong pơlê Dak Lak, tối ăm ‘nâi Tĭnh ŭy Dak Lak hiăng xing xoăng 300 rơtal liăn vâ pro troăng hyôh măng kŏng ngê̆ kơxô̆, tơdrêng amê hnê mơhno mâu khu cheăng, kơvâ cheăng vâ tŏng gum tơ’noăng kơxô̆ liăn tơtro ăm rêm kong pơlê. Rơtế ƀă mê, kong pơlê pêi pro tơdroăng ‘’Kuăn pơlê hnê hriâm kŏng ngê̆’’, tơrŭm ƀă kơvâ on tơhrik, troăng hyôh măng tơniăn troăng măng lĕm, tơdrêng amê po tơ’nôm mâu lâm hnê xúa kŏng ngê̆ ăm khu kŏng chưk pêi cheăng a kơ koan.

‘’Khu pơkuâ Khoa hok ƀă Kŏng ngê̆ hiăng pêi cheăng ƀă mâu khu tê mơdró hyôh phôn ƀă kơvâ on tơhrik vâ tơniăn mơ’no ăm on tơhrik ăm mâu PTS. ‘Na troăng hyôh măng chôa xua tơdjâk troh troăng hyôh măng, mê nôkố tá Viettel ƀă VNPT Dak Lak dế tơkŭm mơ-eăm rơnêu. Rơtế ƀă mê pro tơniăn troăng hyôh măng, tơdroăng pro lĕm mâu kơmăi a ko mơ’nui xuân kal khât ƀă mâu cheăm kal pêi pro. Tơdroăng kố mê tá râ kong pơlê, râ cheăm, bêng ƀă mâu kơ koan, kơvâ cheăng dế pêi pro kơhnâ khât vâ pro tơniăn’’.

Dak Lak dế trâm pơloăng mơnúa ‘na pơhlêh xúa kŏng ngê̆ klêi kơ’nâi tơmot chiâng môi vâ  kum kuăn pơlê pro mơ-éa rêh ối cheăng kâ ƀă tơnêi têa lĕm tro tâ. Tơdroăng kong pơlê khên tơnôu mơ’no hrĭng rơtal liă vâ rơnêu troăng hyôh măng, tơdrêng amê mơdêk hnê xúa kŏng ngê̆ ăm khu kŏng chưk a tíu pêi cheăng ăm hlo khŏm mơ-eăm kân dêi khu cheăng kal kí. Drêng troăng klông châ pro tơniăn lĕm, mơdêk ivá kŏng chưk châ pro lĕm, xuân môi tiah hlê plĕng dêi kuăn pơlê tung pơhlêh xúa kŏng ngê̆, tơdroăng mơjiâng châ tơƀrê ‘’Khu râ kăn pơkuâ pêi cheăng xúa kŏng ngê̆’’, tíu kơpong kân rơdâ Tây Nguyên cho tíu troh mơ’nui ôh tá hơhngế./.