Khu pơkuâ ngăn Đảng ƀô̆ kong pơlê pơkâ rah xo pôa Y Giang Gry Niê Knơng, Kăn phŏ pơkuâ ngăn Đảng ƀô̆ kong pơlê, Kăn hnê ngăn Vi ƀan Măt trâ̆n Tơnêi têa Việt Nam kong pơlê, to pro Kăn pơkuâ hnê ngăn Đảng ƀô̆ hneăng hơnăm 2025-2030. Đảng ƀô̆ Hô̆i đong Kuăn pơlê kong pơlê Dak Lak ai 4 khu tơrŭm cheăng Đảng ối tung khu, ƀă 60 ngế đảng viên. Jâ Cao Thị Hòa An, Pho Kăn pơkuâ hnê mơhno tĭnh ŭy,  Kăn hnê ngăn Hô̆i đong kuăn pơlê kong pơlê châ pơkâ rah xo pro kăn pơkuâ hnê ngăn Đảng ủi Hô̆i đong kuăn pơlê kong pơlê hneăng hơnăm 2025 – 2030.

Tơdrêng mê, Khu pơkuâ hnê ngăn Đảng ƀô̆ kong pơlê Dak Lak pơkâ pơhlêh inâi Khu pơtâng tối tơdroăng tơnêi têa ƀă Mơhnhôk kuăn pơlê Tỉnh ủi chiâng Khu pơtâng tối tơdroăng kal Tỉnh ủi; ai hnoăng cheăng tơbleăng tơdroăng pơtâng tối kuăn pơlê châ pơhlêh chiâng Đảng ủi  Vi ƀan Măt trâ̆n Tơnêi têa ƀă mâu khu râ dêi kong pơlê. Péa đảng ƀô̆ nếo thâ kêi đeăng pơkâ pêi cheăng, xing xoăng hnoăng cheăng inhên, tơniăn tơkŭm po ƀă tơdroăng cheăng pêi phuâng lĕm, đi đo ƀă tơniăn rak pêi tiô ton.