A Rôh hôp Khu pơkuâ hnê ngăn Đảng ƀô̆ kong pơlê Dak Lak rôh má 29, Kăn pơkuâ hnê ngăn cheăng Đảng Dak Lak pơkâ thế rêm râ Đảng, khu tơrŭm cheăng Đảng, kơ koan, tíu pêi cheăng pêi pro tơkŭm pro môi tíu kơ koan pêi cheăng rôh kố athế pêi pro tro hnoăng cheăng kăn ƀô̆ tiô tíu pêi cheăng, rak vế tơniăn tơdroăng rah xo tro mơngế cheăng ai tuăn ngoâ rơkê, kơhnâ, tơdrăng, pôu râng dêi tơdroăng cheăng; pêi klêi tơdroăng cheăng tơkŭm, tơ’mot tíu pêi cheăng kơ koan cheăng kal kí dêi kong pơlê hdrối hâi 20/2/2025.

Ƀă mâu kơ koan tíu pêi cheăng, kong pơlê tá hâi pêi pro túa pơkâ xoăng tơkŭm tơ’mot tíu pêi cheăng rôh kố, pơtối séa ngăn, tơmiât nhên tơ’mot dâng 15% tíu pêi cheăng tro tơdroăng ki hnê mơhno dêi Tơnêi têa. Tiô tối hdrối tung măng tĭng la ngiâ, Dak Lak kô păng ‘nâng tơbleăng mâu pơkâ ‘na tơdroăng cheăng kăn ƀô̆, rĕng ăm kơ koan cheăng tơnêi têa châ pêi cheăng.

Pôa Nguyễn Đình Trung, Kăn pơkuâ hnê ngăn Đảng Dak Lak ăm ‘nâi, Khu pơkuâ hnê ngăn Đảng, Hô̆i đong hnê ngăn, Vi ƀan hnê ngăn kô tơbleăng mâu pơkâ klêi kơ’nâi hôp Hô̆i đong hnê ngăn. Klêi mê, ngế ki ối a ko mâu kơ koan, tíu pêi cheăng ƀă râ phŏ athế pơxiâm pêi mâu tơdroăng cheăng; ‘mot tơkŭm mâu tíu pêi cheăng, liăn ngân, kế tơmeăm, mâu tăm pŏng mê ah kô pêi cheăng păng ‘nâng mâu kơ koan tíu pêi cheăng nếo sap ing hâi lơ 1/3/2025.