Kơxê măng lơ 20/10, Khu ngăn vâi kơdrâi Khâu mơdró kâ kong pơlê Dak Lak tơkŭm po tơdroăng trâm mâ tơbâ 95 hơnăm Hâi mơjiâng Khu vâi kơdrâi Việt Nam (20/10/1930 – 20/10/2025) ƀă Rôh tơ’noăng khu mơdró kâ vâi kơdrâi Rơkê lĕm rôh má 3 pơxá inâi Vâi  kơdrâi mơdró kâ tung chal mơ-eăm mơnhông tơná.

A rôh trâm mâ, Khu tơkŭm po hiăng ô eăng, khĕn kơdeăn mâu khu pú hên ƀă ngế krê ki kơhnâ rơkêm, diâp mơ-éa mơnhên hô̆i viên nếo, tơdrêng amê hlối tơbleăng tơdroăng tơ’noăng “Vâi kơdrâi mơdró kâ Kơhnâ rơkê lĕm” ƀă mâu rôh tơ’noăng xâp ếo xŏn, tơpui tiâ ƀă mơđah tơbleăng ngê̆ thuât.

Tơpui a rôh po tơdroăng, pôa Y Giang Gry Niê Knơng - Phŏ pơkuâ hnê ngăn cheăng Đảng, Kăn hnê ngăn Vi ƀan Măt trâ̆n Tơnêi têa Việt Nam kong pơlê Dak Lak teăng mâ khu pơkuâ Đảng tơmâng xo ƀă khĕn kơdeăn mâu tơdroăng veăng gum dêi khu vâi kơdrâi ki cheăng ‘na mơdró kâ ƀă tơdroăng mơnhông cheăng kâ rêh ối pơlê pơla dêi kong pơlê.

Tơdrêng amê hlối rơhêng vâ mâu vâi kơdrâi pơtối mơdêk khôi hmâ, pơhlêh nếo tơmiât pêi rơkê, tối rơdêi hnoăng cheăng ƀă ivá khên tơnôu dêi tơná tung chal ki mot tơrŭm cheăng ƀă pơhlêh kơxô̆.