VOV4.Xơ Đăng -  Tung lối 1 khế hdrối nah, mơheăm vâ kum pơlât tơdrêng ƀă pơlât ăm mâu ngế ki châi tamo a kong pơlê Dak Lak đi đo ôh tá ai xua mơheăm ki ‘măn kơdĭng a mâu tíu xiâm khăm pơlât hiăng tâi, tung pơla túa pơkâ tơdah xo mơheăm ki pleăng xuân tá hâi châ tơbleăng. Tiô tơdroăng ăm ‘nâi sap ing Khu hnê mơhno mơhnhôk pleăng mơheăm kong pơlê Dak Lak, tung khế 3 ƀă apoăng khế 4, tơdroăng ki pơtroh mơheăm ăm hnoăng cheăng pơlât tơdrêng ƀă pơlât ăm mâu ngế ki châi tamo trâm hên xơpá.

Dak Lak: Ôh tá ai mơheăm tung tơdroăng ki pơlât tơdrêng ƀă pơlât mâu ngế ki châi tamo

A hngêi pơkeăng kân kơpong Tây Nguyên, rêm khế kal sap ing 1.800 – 2.000 tơdrong mơheăm vâ pơlât tơdrêng ƀă pơlât ăm mâu ngế ki kal châ pâk ‘mot mơheăm la pơla hdrối kố nah bu nếo ai tơdế kơxô̆ mơheăm ki kal tiô tơdroăng ki rơhêng vâ. Pôa Nguyễn Đức Phú, ngế ki pơkuâ ƀơrô Khu hnê mơhno mơhnhôk pleăng mơheăm kong pơlê Dak Lak ăm ‘nâi: Nôkố, Khu hnê mơhno mơhnhôk pleăng mơheăm kong pơlê hiăng chêh pro hlá mơéa pơtroh ăm Vi ƀan hnê ngăn kong pơlê pơkâ thế kơvâ ngăn pơkeăng ‘mot tơ’nôm teăm tơdrêng mâu trếo pơkeăng vâ rĕng tơbleăng túa pơkâ pleăng mơeăm, mơdêk kơxô̆ mơheăm ki kum ăm mâu tíu khăm pơlât ƀă hngêi pơkeăng tung kong pơlê.

Katarina Nga tơplôu ƀă tơbleăng