Hdrối mê, Vi ƀan kong pơlê Dak Lak hiăng ai mơ-éa pơkâ kăn pơkuâ mâu khu, kơvâ cheăng, tíu cheăng ki tơdjâk ƀă Kăn hnê ngăn Vi ƀan mâu cheăm, bêng thâ tơrŭm pêi pro tơdâng tơ’mô mâu troăng pêi. Mâu cheăm bêng kĭng têa kơxĭ pêi pro troăng tơniăn ‘na kuăn mơngế, rơxế, tơmeăm khoăng, ki rơhêng vâ tối a mâu tíu ôm hyô, kơpong păn, tơnăng ká xi xŏng; hnê mơhno tot plong tuk, kât krá, rak vế hlâm păn ká xi xŏng.

Mâu cheăm, bêng kơpong kong ngo đi đo tối tơbleăng teăm tơdrêng ‘na kong mêi khía mơhot, kong mêi têa kân lân lu troh kuăn pơlê; thăm hnê mơhno inhên tơdroăng hbrâ ví têa kân, lân lu, tơnêi tơhnah tơhnâp, têa rơlêa. Tơdrêng amê, séa ngăn mâu kơpong ki tơ’lêi trâm kong prâi pro ôh tá tơniăn, hbrâ xĕn kuăn pơlê troh tíu tơniăn.

Mâu tíu cheăng hbrâ khu mơngế pêi cheăng, kơmăi kơmok, plong tuk, tơmeăm kal xúa rêm hâi tiô troăng ‘’pŭn tơdrêng’’; séa ngăn troăng tơniăn mâu ‘noăng kâng tât têa, rơchôa long têa; tơkŭm gâk ngăn, séa ngăn, hnê mơhno prôk troăng tơniăn a mâu tíu ki têa lân, plế, kơpong lân lu trâu, khŏm ôh tá ăm kuăn pơlê ƀă rơxế prôk tơkâ hluâ tâng ôh tá tơniăn lĕm.