VOV4.Xơ Đăng - Kơxo lơ 26/1, Khu mơđah tơbleăng kong pơlê Dak Lak tơrŭm ƀă Khu pơkuâ tơdroăng kal tiô troăng rơ’jíu, um tơvi ƀă măng Internet ƀă Tíu chô ‘măn kơxop mơ-eá kong pơlê Dak Lak tơkŭm po pơxiâm po Hâi mơđah tơbleăng Hơngui Nhâm Dần 2022. Tơkŭm po sap hâi lơ 26/1, troh hâi lơ 4/2 la ngiâ, Hâi tơbleăng hlá tơbeăng Nhâm Dần kong pơlê Dak Lak mơđah tơbleăng lối 250 hlá tơbeăng ƀă lối 400 to ko kơxop mơ-éa tŭm túa.

Tiô mơnhên dêi khu tơkŭm po, mâu mơ-éa hlá tơbeăng hơnăm kố châ pro lĕm tŭm têk, mơhno tơdroăng ki rơkê ƀă tơmiât pêi rơkê ing pro kơdôu hlá tơbeăng, ai chêh hên ‘na tơdroăng xiâm, mâu tơdroăng pơxá ‘na phiu ro Đảng, phiu ro hơngui, pâ mơnê Pôa Hồ, mâu tơdroăng châ tơƀrê dêi mâu kơvâ, kong pơlê ƀă mâu râ kuăn pơlê.

Dak Lak po Hâi mơđah Hlá tơbeăng rơnó Hơngui Nhâm Dần 2022

Chêh tối ‘na tơdroăng kal kí, cheăng kâ, rêh ối pơlê pơla, tơdroăng ki nếo, tơdroăng ki khên tơnôu dêi kuăn mơngế Việt Nam, mâu tơdroăng châ tơƀrê cheăng kâ, pêt mơjiâng tơmeăm tơmiât troh tơdroăng la ngiâ lĕm tro dêi tơnêi têa. Klêi kơ’nâi Hâi mơđah tơbleăng, mâu mơ-éa kô châ pơtroh diâp ăm mâu kăn ƀô̆, mô đô̆i tung rơlốu Trường Sa, ối tung kơ koan xiâm pơkuâ lêng gâk kring têa kơxĭ kơpong 4, kong pơlê Khánh Hòa.

A Sa Ly tơplôu ƀă tơbleăng