Kơxo lơ 26/2, a pơlê kong kơdrâm Ƀuôn Ma Thuột, Khu tơkŭm po Leh tơbleăng Kơphế Ƀuôn Ma Thộut rôh má 9 hơnăm 2025, pơtối hôp tơbleăng ‘na tơdroăng ki tơkŭm po. Kố cho rôh hôp tơbleăng má 3 klêi kơ’nâi péa xôh tơkŭm po a Pơlê kong kân Hồ Chí Minh ƀă Hà Nội. Hơnăm kố, leh tơbleăng kơphế kô ai 17 tơdroăng po ki păng ‘nâng. Pakĭng mâu tơdroăng ki tơkŭm po môi tiah mâu hneăng mơdĭng tơkŭm po ki hdrối nah, leh rôh kố ai hên tơdroăng ƀă mâu tơdroăng tơkêa châ pơxiâm po vâ koh hak 50 hơnăm tơleăng lĕm Ƀuôn Ma Thuột, môi tiah Leh pơxiâm pro Hngêi kơmăi kơphế Tíu xiâm tê mơdró – Hngêi ăm tơmối kâ koi ối pơtê – Hngêi ối a Pơlê kong kơdrâm Ƀuôn Ma Thuột; leh pơxiâm po tơnêi ăm Tơdroăng Tơkêa mơjiâng pro Kơpong cheăng kơmăi kơmok Phú Xuân.

Leh mơđah tơbleăng Kơphế Ƀuôn Ma Thuột rôh má 9 hơnăm 2025, ƀă inâi ‘Ƀuôn Ma Thuột – Tíu troh dêi kơphế lâp plâi tơnêi”, kô po sap ing hâi lơ 09/3/2025 – 13/03/2025.  Pôa Nguyễn Tuấn Hà, Phŏ kăn hnê ngăn Vi ƀan kong pơlê Dak Lak, Ngế xiâm pơkuâ khu tơkŭm po Leh tơbleăng kơphế kố ăm ‘nâi, kố xuân cho tơdroăng ki pơkâ mơdêk tê mơdró ai pơxúa kal;  cho rôh vâ mâu khu pơkuâ ngăn, khu mơdró kâ ƀă mâu vâi pú kong têa ê trâm mâ, tơrŭm tê mơdró, tơdrêng amê hlối mơđah tơbleăng inâi kơphế Ƀuôn Ma Thuột, mơnhông ôm hyô ƀă tơdjêp tê mơdró.