VOV4.Xơ Đăng - Tơdjâk troh tơdroăng mâu tơring klâ kơtăn kuăn pơlê vêh pơlê xiâm kâ Têt Lo hơnăm nếo Nhâm Dần 2022, Vi ƀan kong pơlê Dak Lak hiăng ai mơ-éa hnê mơhno mâu tơring ôh tá klâ kơtăn kuăn pơlê vêh pơlê xiâm kâ Têt mê pêi pro mâu troăng hiăng châ Khu xiâm pơkuâ ngăn pơkeăng ƀă khăm pơlât hnê mơhno vâ hbrâ, mơdât pơreăng COVID-19.

Klêi kơ’nâi tơdroăng Hngêi pơkeăng cheăm Ea Blang, pơlê kong krâm Ƀuôn Hồ, Dak Lak pơkâ mâu kuă pơlê vêh kong pơlê Dak Lak kâ Têt thế klâ kơtăn 7 hâi mơhé hiăng pâk 3 trum vaccine, hâi lơ 26/1, Vi ƀan kong pơlê Dak Lak hiăng ai mơ-éa pơkâ Khu hnê mơhno ƀă Tíu xiâm hnê mơhno hbrâ, mơdât pơreăng COVID-19 a mâu tơring, pơlê kong krâm, pơlê kong kơdrâm thâ séa ngăn, hnê mơhno mâu tíu cheăng, tơring tung kong pơlê  ôh tá pơkâ xêh mâu pơkâ krê ‘na hbrâ, mơdât pơreăng COVID-19 mê thăm hnê mơhno, pơkâ dêi Chin phuh, Khu xiâm pơkuâ ngăn pơkeăng ƀă khăm pơlât pro pá ăm kuăn pơlê drêng vêh pơlê xiâm kâ Têt. Xêo troh kơxo lơ 27/1, kong pơlê Dak Lak hiăng châ hlo 15.714 ngế tro tâ COVID-19, tung mê u ối 2.456 ngế dế pơlât ƀă 85 ngế hlâ.

A Sa Ly tơplôu ƀă tơbleăng