VOV4.Xơ Đăng - Ƀă tơdroăng pêi pro rêm hâi ăm hlo ing 800 troh 1 rơpâu ngế tâ COCID-19 pro hngêi pơkeăng pơlê kong kơdrâm Ƀuôn Ma Thuột , kong pơlê Dak Lak trâm pá hâ ho mơngế. Pơlê kong kơdrâm Ƀuôn Ma Thuột dế mơ-eăm tơbleăng troăng rơhlâ ki rơkê, tơtro vâ tơdroăng cheăng kum pơlât F0 a hngêi châ tơ-ƀrê.

Nâ Võ Thị Thủy, ngế pêi cheăng Hngêi pơkeăng bêng Ea Tam, pơlê kong kơdrâm Ƀuôn Ma Thuột, kong pơlê Dak Lak tối ăm ‘nâi, mâu hâi hiăng hluâ, khu thái, ƀok thái pơkeăng mơ-eăm tâi ivá ƀă tơdroăng drêng thế tơdah hên hnoăng cheăng. Mơhé kơhâi lơ kơmăng, rêm roh ai kuăn pơlê krếo phôn kal troh a hngêi tŏng kum mê mâu ngế pêi cheăng a hngêi pơkeăng bêng Ea Tam pơtối rĕng troh kum.

‘’Drêng lâi vâi ai tơdroăng châi mơhno  a ngâ, SPO2 pá kơdâm 96 mê á sâp ếo lăm troh tŏng kum krâ oxy ăm, klêi mê hiâm oxy môi pơla, klêi mê hnê mơhno mâu nhŏng o tung hngêi pro ăm lo xêh tơtro oxy. Nôkố tâng ‘nân amê châ chôu mê ôh tá ai ngế vâ ối ‘nân, chôu ki lâi xuân prôk tâi tâng, 2-3h kơxo xuân prôk. Drêng lâi F0 kal tŏng kum mê troh tŏng kum hlối. Kơxô̆ F0 dêi bêng tâk hên mê á hlo lối hên ƀă mâu thái, ƀok thái pơkeăng cheăm, bêng tung pơla nôkố’’.

Mâu ngế pêi cheăng khăm pơlât hnê mơhno mâu ngế tro tâ COVID-19 ‘mot phân mêm khualo rak ngăn F0 a hngêi dêi bêng

Tiô pôa Ngô Mạnh Cường, Kăn pơkuâ hngêi pơkeăng bêng Ea Tam, pơlê kong kơdrâm Ƀuôn Ma Thuột, Ea Tam cho bêng ai kơxô̆ mơngế tơkŭm kơdrâm ƀă lối 36 rơpâu ngế ƀă xuân cho bêng châ hlo kơxô̆ ngế tâ tú COVID-19 hên. Sap ing pêi pro pơlât F0 a hngêi troh nôkố bêng hiăng tŏng kum pơlât ăm lối 1.300 ngế F0, tung mê, ai vâ chê 400 ngế hiăng pơlât prêi, bu ai 6 ngế thế mot pơlât a hngêi pơkeăng.

Hngêi pơkeăng bêng Ea Tam hiăng mơjiâng khu Zalo tŏng kum, hnê mơhno mâu kuăn pơlê tro tâ pơreăng tung bêng. Ing mê, tiah mê rêm hâi, kuăn pơlê châ kăn ƀô̆ khăm pơlât hnê mơhno rak ngăn, séa ngăn, pơlât a hngêi. Drêng ai tơdroăng ki ôh tá tơniăn, bu kal kuăn pơlê tơbleăng cho khu khăm pơlât dêi bêng ai mâ tơdrêng amê vâ veăng pơlât teăm tơdrêng. Pôa Ngô Mạnh Cường tối:

‘’Tâi tâng mâu ngế yương tĭnh pơrá thế xúa veăng tung khu mê, tâng hlo châi râ rơ-iô cho thế kơtâu mot tung khu, ai tơ’lêi môi tiah mê á pơkuâ châ tơƀrê lĕm păng ‘nâng. Pơtih hên pơchân tối, video pơtâp hiâm ki kố ki tá ai khu F0, mê á bu kal pơkâ kuăn pơlê pơtâp tiô video mê pơtâp hiâm mê kuăn pơlê pêi tiô tê, mê cho troăng pơtâng tối tơtro má môi, ôh tá ai ivá vâ lăm rêm hngêi hnê mơhno pơtâp hiâm.

Ối tung khu vâ kuăn pơlê ngăn tơdroăng tơdjuôm kơ-o, tơngê, ôh tá kâi hiâm mê cho tơdroăng ki mơhno pakong dêi pơreăng ôh tá tro klâi ôh, kơbố xuân tơngê, kơ-o, pá vâ hiâm xua mê vâi hmiân tuăn ôh tá tơmiât klâi. Nôkố thế xúa kŏng ngê̆, tâng ôh tá ai kŏng ngê̆ mê ôh tá chiâng pêi cheăng klâi’’.

Nâ Thủy hnê mơhno ăm 1 ngế F0 pơlât a hngêi

Tiô ƀok thái pơkeăng Võ Minh Hùng, Kăn pơkuâ Tíu xiâm khăm pơlât pơlê kong kơdrâm Ƀuôn Ma Thuột, xêo troh nôkố, tung pơlê kong kơdrâm Ƀuôn Ma Thuột dế tơkŭm klâ kơtăn, pơlât a hngêi ăm vâ chê 7 rơpâu ngế tro tâ COVID-19. Ai mâu bêng vâ chê 1 rơpâu ngế F0 dế pơlât a hngêi. Mơhé mâu hngêi pơkeăng cheăm, bêng hiăng châ tơ’nôm mơngế pêi cheăng cho mâu ngế pleăng hnoăng cheăng, laga kơxô̆ mơngế pêi cheăng xuân ối iâ drêng ai hên ngế tro tâ pơreăng pro tơdroăng cheăng thăm rế hngăm, pá puât hên.

‘’Tơdroăng ki ai khât nôkố mê cho tơdroăng mơngế pêi cheăng dêi Hngêi pơkeăng cheăm, bêng, nhŏng o thái, ƀok thái pơkeăng dêi mâu cheăm mơhé hiăng ai mâu ngế ki pleăng hnoăng cheăng veăng kum pêi cheăng laga mâu ngế tro tâ pơreăng lối hên ‘nâng xuân pói vâ kuăn pơlê drêng châ hlo cho F0 mê thế tơbleăng ăm cheăm, bêng, pêi pro 5K ƀă pêi pro séa ngăn xêh ivá a hngêi.

Drêng ai tơdroăng klâi ‘na ivá lơ châi râ mê thế krếo mâu hngêi pơkeăng cheăm, bêng vâ ngin hnê mơhno pêi pro tơtro tơdroăng rak ngăn ivá ăm mâu ngế F0 dế pơlât a hngêi. Ngin xuân hiăng hnê mơhno ăm tâi tâng mâu ngế pêi cheăng tung hngêi pơkeăng cheăm, bêng tung lâp pơlê kong kơdrâm tơmâng tŏng kum ƀă hnê mơhno teăm tơdrêng ăm mâu ngế F0 ƀă ôh tá ăm ai tơdroăng F0 ôh tá châ krếo ƀok thái pơkeăng cheăm, bêng’’.

Xêo troh hâi lơ 2/3, pơlê kong kơdrâm Ƀuôn Ma Thuột châ hlo lối 15 rơpâu ngế tro tâ COVID-19, tung mê vâ chê 8.500 ngế pơlât prêi, 36 ngế hlâ. Pơlê kong kơdrâm Ƀuôn Ma Thuột xuân cho tíu ai kơxô̆ ngế tro tâ pơreăng hên má môi dêi kong pơlê Dak Lak.

Drêng ai tơdroăng kố, Tíu xiâm khăm pơlât hiăng hbrâ hnê mơhno mâu Hngêi pơkeăng cheăm, bêng thăm séa ngăn, tôe xo têa môh test rĕng  pơreăng ƀă mâu ngế ki tơ’lêi tro tâ vâ châ hlo mâu ngế F0 vâ pơlât teăm tơdrêng ƀă ví tâ tú tung pơlê pơla; ăm hok tro mâm non pơtê hriâm ƀă pơtê pơtân tơdroăng hriâm tơdrêng a hngêi trung ƀă hok tro râ má môi, râ má péa, râ má pái; tơdrêng amê thăm pơtâng tối ăm kuăn pơlê ‘na tơdroăng hbrâ mơdât pơreăng môi tiah pêi pro kơtăng tơdroăng pơkâ thế 5K.

Krê ƀă kơvâ khăm pơlât, vâ ai mơngế pêi cheăng ăm mâu hngêi pơkeăng cheăm, bêng drêng kơxô̆ mơngế tro tâ pơreăng tâk rĕng, kơxô̆ mơngế F0 pơlât a hngêi hên, Tíu xiâm hiăng thăm pơtroh mơngế pêi cheăng ăm mâu hngêi pơkeăng, hnê mơhno mâu cheăm, bêng pro tơniăn tŭm mâu Hngêi pơkeăng cheăm ki troh lâp lu.

Ki nhên, rêm hngêi pơkeăng cheăm kô châ tơ’nôm sap ing 4 – 6 ngế pêi cheăng cho mâu ngế ki pleăng hnoăng cheăng, mâu kăn ƀô̆ ƀok thái pơkeăng hiăng pơtê cheăng xua hơnăm hiăng krâ lơ mâu ƀok thái pơkeăng ki pêi cheăng krê pa kong tung pơlê kong kơdrâm.

A Sa Ly tơplôu ƀă tơbleăng