VOV4.Xơ Đăng - Mâu hâi ki kố, pơlê reăng Xóm Đào a pơlê kân Ƀuôn Trấp, tơring Krông Ana, kong pơlê Dak Lak hiăng hlo hơniâp ro tâ. Tiô mâu ngế ki rak ngăn kơdrum reăng, hơnăm kố hên mâu ngế ki pêi kơdrum hiăng khên tơnôu mơdêk ƀăng tơnêi pêt reăng Têt tâng vâ pơchông ƀă rêm hơnăm. Hyôh kong prâi tơniăn lĕm, yă tê tơniăn ƀă to kơnâ iâ mê kuăn pơlê ki pêt phiu ro.

Djâ ngế ki rôe troh lăm pôu ngăn kơdrum pêt reăng têt, pôa Hoàng Yên, ối a tôh kơphô̆ 7, pơlê kân Ƀuôn Trấp, tơring Krông Ana, kong pơlê Dak Lak tối ăm ‘nâi, tâi tâng mâu kơ’noăng pêt reăng pơrá hiăng ai ngế kok rôe, to lâi hâi nếo kô pơcháu. Rơnó reăng têt hơnăm kố, pôa Yên pêt 3 sao reăng cúc ƀă lay ơn tŭm túa, tâk châ péa xôh tơdế tâng pơchông ƀă rêm hơnăm. Mơhé ai pơreăng COVID-19 xông tâ tú ó, laga tơdroăng ki ai hên mơngế rôe môi tiah nôkố, pôa Yên xuân loi tơngah khât ‘na tơdroăng kal vâ kơchơ tê mơdró reăng tung roh Têt Lo hơnăm nếo hơnăm kố.

‘’Tối tơdjuôm hơnăm kố kong prâi tơniăn lĕm tâ rêm hơnăm xua mê hơnăm kố ngin pêi hên tâ rêm hơnăm nếo. Apoăng mê sap ing tung dế khế 10 âm lĭch ƀă tung dế khế 11 âm lĭch mê yă reăng to kơnâ mê ngin xuân phiu ro mê tiô á tối hdrối Têt kố yă reăng xuân to kơnâ’’.

Tơmối troh a kơdrum pêt reăng vâ kok reăng Têt

Xuân mơdêk ƀăng pêt reăng têt tâng pơchông ƀă rêm hơnăm, pôa Trần Đình Sang, tôh trương tôh tơrŭm pêt reăng mê pơlê kân Ƀuôn Trấp tối ăm ‘nâi, sap 1 khế hdrối, hên ngế tê mơdró hiăng troh kok rôe reăng a kơdrum, yă xuân kơnâ tâ rêm rôh. Ôh tá xê to rơpŏng pôa, hên khu tơrŭm cheăng ki ê tung tôh tơrŭm cheăng xuân hiăng khên tơnôu mơdêk ƀăng pêt reăng têt vâ tơxâng tiô tơdroăng kal vâ kơchơ mơdró.

Nôkố, pơlê reăng Xóm Đảo, ối a tôh kơphô̆ 7, pơlê kong krâm Ƀuôn Trấp châ ngăn cho ‘’tíu pêt reăng hên’’ kân má môi tơring Krông Ana. Rơtế ƀă mơnhông mơdêk tơdroăng pêt reăng, mâu kơdrum pêt ối tơrŭm troăng pêi ‘’pơlê pêt reăng lĕm ƀă kong prâi, kuăn mơngế’’ vâ ăm kuăn pơlê, tơmối troh lăm ngăn, ngăn reăng ƀă xup um, mơjiâng tíu ôm hyô, kum kuăn pơlê mơdêk pêi lo liăn tung roh têt.

Pôa Trần Đình Sang tối:

‘’Nôkố hngêi á pêt 4 sao, ki hên cho reăng cúc tŭm túa ƀă reăng lay ơn mâu mơngiơk, tŭm túa. Nôkố Têt mê tôh tơrŭm cheăng ngin, kuăn pơlê hiăng kok rôe tung roh Têt hên xua mê mơni tung roh têt la ngiâ kô ôh tá bê reăng xua mê tung roh hdrối nah xua pơreăng xông tâ tú hên mê kuăn pơlê a mâu kơpong ki ê kơdroh pêt reăng laga tôh tơrŭm cheăng ôh tá tô tuăn mê tơ’nôm ƀăng pêt ƀă nôkố hngêi ki lâi xuân mơdêk tơ’nôm ƀăng pêt reăng’’.

Pôe xo reăng pơcháu ăm khu ngế ki rôe hên

Mơjiâng sap ing mơ’nui hơnăm 2018, Tôh tơrŭm pêt reăng pơlê kong krâm Ƀuôn Trấp nôkố ai 14 khu tơrŭm cheăng, tâi tâng ƀăng pêt reăng vâ chê 3 ha. Ôh tá xê to pêt reăng vâ tê hâi têt, mâu khu tơrŭm cheăng ối pêt reăng vâ tê tung kơchơ mâu hâi khế mơniâ, hâi leh, ƀă hên reăng môi tiah cẩm chướng, cúc, lay ơn, đồng tiền.

Tiô pôa Nguyễn Xuân Hậu, Kăn hnê ngăn Kuăn pơlê pêi chiâk deăng pơlê kân Ƀuôn Trấp, tơdroăng pêt reăng hiăng kum hên rơpŏng pêi lo châ liăn tơniăn, mơnhông mơdêk tơmeăm ki ai hlâu dêi pơlê kong krâm tung mơnhông mơdêk pêt mơjiâng tơmeăm, tê mơdró. Tơdroăng mơjiâng dêi khu tơrŭm cheăng pêt reăng xuân pro tơ’lêi hlâu tâ ăm kuăn pơlê tung tơdroăng châ mung liăn, veăng mâu lâm hnê kih thuât, ing mê xúa khoa hok kơmăi kơmok tung pêt mơjiâng, tê mơdró.

‘’Mê ngin xuân tơkŭm mơjiâng tôh tơrŭm cheăng tơdrêng amê mơ’no liăn tăng cheăng pêi ăm kuăn pơlê akố ƀă tơdrêng amê xuân kơnôm Khu pơkuâ kuăn pơlê pêi chiâk deăng mâu râ pro tơ’lêi hlâu rêm roh hơngui troh mê ngin thăn tơbleăng tối mâu tơmeăm tung mâu trang Internet pơlê pơla xuân môi tiah tung mâu rơ’jíu, um tơvi vâ pro ti lâi kum châ tê tơmeăm ăm vâi krâ kuăn pơlê’’.

Klêi kơ’nâi môi pơla rơhĭng rơhối xua tơdjâk pơreăng kân, laga mâu tơdroăng ki phiu ro iung kơchơ mơdró reăng têt hiăng kum mơngế pêt a pơlê kong krâm Ƀuôn Trấp, tơring Krông Ana, kong pơlê Dak Lak thăm phiu ro. Kong prâi tơ’lêi hlâu, yă tơniăn djâ ăm kuăn pơlê tơdroăng pói tơngah ‘na rơnó reăng têt châ pêi lo hên reăng, châ yă kơnâ há.

H’Xíu H’Mok chêh

A Sa Ly tơplôu ƀă tơbleăng